Missti sígarettuna og ók á girðingu

Ungur ökumaður varð fyrir því óláni í nótt að keyra á girðingu eftir að hann missti logandi sígarettu í miðjum akstri. Flytja þurfti piltinn á slysadeild. Tilkynnt var um 28 umferðaróhöpp í höfuðborginni síðasta sólarhring.

Samkvæmt upplýsingum frá lögreglunni á höfuðborgarsvæðinu var drengurinn að reykja undir stýri þegar hann missti sígarettuna frá sér. Við það fipaðist hann og ók á rammgerða girðingu á Reykjanesbraut í Kópavogi. Bíllinn skemmdist töluvert og voru skráningarnúmer hans fjarlægð. Pilturinn og farþegi í bílnum voru fluttir á slysadeild en meiðsl þeirra voru ekki talin alvarleg.

Alls voru 28 umferðaróhöpp tilkynnt til lögreglunnar á höfuðborgarsvæðinu á síðasta sólarhring. Einn var tekinn fyrir lyfjaakstur og annar fyrir að aka án þess að hafa öðlast ökuréttindi. Sá síðarnefndi framvísaði fölsuðum skilríkjum en samkvæmt þeim var ökumaðurinn rúmlega tvítugur. Við eftirgrennslan lögreglu kom hins vegar í ljós að ökumaðurinn var aðeins 16 ára.