Líf og fjör í réttum

Um sex þúsund fjár og tvö hundruð manns voru í Oddstaðarétt í Lundarreykjadal í síðustu viku. Að sögn Davíðs Péturssonar, hreppsstjóra í Skorradal, var glatt á hjalla enda var tappi tekinn úr flösku eins og hefð er fyrir á svona stundum. Hann segir þó að sveitungar á þessum slóðum verði seint lofaðir fyrir mikla sönggleði. Flestar voru kindurnar frá Andakíl, Lundarreykjadal og Borgarsveit en menn komu víða að til að fylgjast með enda er löng hefð fyrir Oddstaðaréttinni.