Bæti aðstoð við sjúklinga

Heilbrigðisráðherra telur nauðsynlegt að stofnanir í heilbrigðiskerfinu bæti aðstoð sína við sjúklinga og öryrkja sem leita úrræða hjá hinu opinbera. Fréttastofan hefur bent á að ofbeldisbrotaþolar hafi ekki fengið upplýsingar um hvaða hjálp sé að fá heldur villist þeir endalaust í völundarhúsi kerfisins. Þeir sem leita eftir aðstoð og ráðgjöf í heilbrigðiskerfinu, eftir alvarleg slys eða áföll, standa oft frammi fyrir flóknu völundarhúsi þar sem erfitt virðist að fá upplýsingar um það hvert viðkomandi getur snúið sér og hvaða möguleikar eru til lausnar. Margrét Jónsdóttir, forstöðumaður þjónustumiðstöðvar Tryggingarstofnunar ríkisins, hefur bent á að því miður sé í raun ekki á neinn einn stað að leita fyrir fólk sem lendi í svona áföllum. Spurningar hafa meðal annars vaknað um það hvort einhvers konar umboðsmaður eða ráðgjafi, á borð við umboðsmann sjúklinga, ætti að hafa það verkefni með höndum að vísa fólki veginn og aðstoða það við að leita lausna. Jón Kristjánsson heilbrigðisráðherra bendir á að stofnanir í heilbrigðiskerfinu séu með upplýsingastarfsemi á sínum vegum þannig að hann leggur á það áherslu, hvað sem umboðsmanni sjúklinga líður, að stofnanirnar efli sína upplýsingagjöf. Það sé ekki á dagskránni að koma þessu embætti á að svo stöddu.