Talar við leiðtoga allra flokka

Angela Merkel lýsti því yfir fyrir stundu að hún ætlaði sér að tala við leiðtoga allra stjórnmálaflokka landsins um stjórnarmyndun í Þýskalandi. Ingólfur Bjarni Sigufússon, fréttamaður Stöðvar 2 og Bylgjunnar, er í Berlín. Fréttaskýrendur eru sammála um að mestar líkur séu á samsteypustjórn stóru flokkanna, kristilegra demókrata og jafnaðarmanna, undir forystu Gerhards Schröders. Það þarf þó væntanlega flóknar viðræður til að samningar takist þeirra á milli, t.d. um hvort þeirra verður kanslari. Bæði hafa lýst yfir sigri og gert tilkall til embættisins. Merkel segir stjórnarflokkana hafa tapað í gærkvöldi sem er vissulega rétt því þeir misstu meirihlutann á þingi og geta ekki myndað stjórn aftur einir. Schröder bendir á að niðurstaðan sé ekki jafn slæm og búist hafi verið við; að kristilegir demókratar hafi líka tapað fylgi. Þeir geti ekki myndað stjórn með frjálslyndum eins og þeir hafi viljað. Samsteypustjórn flokkanna er hugsanleg undir Schröder, þrátt fyrir þessar yfirlýsingar. Talið er líklegt að Merkel verði kennt um að flokknum gekk ekki betur en raun ber vitni og að henni verði skipt út í hvelli, enda er ljóst að hún stóð ekki undir væntingum. Eftirmaðurinn gæti þá sætt sig við að vera varakanslari Schröders. Fyrir utan digurbarkalegar yfirlýsingar í ræðupúltum má segja að stjórnmálamennirnir hérna í Þýskalandi séu upp til hópa kjaftstopp. Þeir geta ekki útskýrt skilaboðin frá kjósendum sem virðast þó á margan hátt skýr, í það minnsta fyrir þá sem ræddu við kjósendur fyrir kosningarnar. Fólk hér vildi breytingar en hafði ekki trú á að þær yrðu neinar þó að Merkel yrði kanslari. Flestir voru samkvæmt könnunum á því að hvorugur stóri flokkurinn hefði öll svörin við vandamálum landsins og í ljósi þess er ekki erfitt að geta sér til um hvaða skilaboð kjósendur voru að senda í gær. Þau voru að lýsa frati á stjórnmál og stjórnmálamenn sem hafa nú á annan áratug glímt við atvinnuleysi og efnahagsstöðnun án þess að koma með lausnir sem einhverju hafa breytt. Litlu flokkarnir fengu góða kosningu sem undirstrikar hugsanlega enn frekar vilja þjóðarinnar til að sjá breytingar. Frjálslyndir fengu betra fylgi en áratugum saman, Vinstri flokkurinn tvöfaldaði fylgi sitt og fékk fjórðung atkvæða í Austur-Þýskalandi og græningjar töpuðu aðeins hálfu prósentustigi. Næstu skrefa er að vænta á næstu stundunum. Staðan er svo undarleg nú að enginn veit með vissu hver ætti að fá stjórnarmyndunarumboð. Stjórnmálaskýrendur hér segja að það gæti tekið margar vikur að leysa þann vanda sem kosninganiðurstöðurnar eru.