Semur fyrir Hollywood-mynd

Barði Jóhannsson hefur ásamt Daniel Hunt úr ensku hljómsveitinni Ladytron samið tónlistina við bandarísku spennumyndina Would You Rather.

„Við vorum búnir að gera músík saman sem hljómaði svolítið eins og tónlist við þriller. Síðan heyrðu menn þetta og vildu fá okkur í þetta,“ segir Barði.

Hvernig mynd er þetta? „Hún er ágæt. Það eru allir pyntaðir og drepnir,“ segir Barði hreint út en þetta er í fyrsta sinn sem hann semur tónlist við bandaríska kvikmynd. „Þetta er það fyrsta sem ég geri fyrir Bandaríkin, fyrir utan að ég hef verið með músík í sjónvarpsþáttum, þannig að þetta er voða spennó og gaman,“ segir hann. „Það er verið að ræða framhaldið og ég á von á að það komi fleiri myndir í kjölfarið. Ég hef verið að ræða við leikstjóra næstu myndar en svona ferli tekur langan tíma og hún kemur kannski ekki út fyrr en eftir tvö ár.“

Leikstjóri Would You Rather heitir David Guy Levy og er ungur og upprennandi, bæði sem leikstjóri og framleiðandi. Biblía bandaríska kvikmyndaiðnaðarins, Variety, valdi hann sem einn af eftirtektarverðustu framleiðendunum í Hollywood. Barði á reyndar enn eftir að hitta hann, sem er kannski ekki skrítið því öll vinnan hans við tónlistina fór fram á Íslandi.

Með aðalhlutverkin fara Brittany Snow, sem hefur leikið í sjónvarpsþáttunum American Dreams, Nip/Tuck og Harry"s Law, og Jeffrey Combs, sem eitt sinn lék í vísindaskáldsögutryllinum Re-Animator sem er einmitt í miklu uppáhaldi hjá Barða. Einnig er John Heard, sem er þekktur úr Home Alone-myndunum, í leikaraliðinu. „Það engin stjarna þarna en þetta er allt fólk sem er búið að vera að gera eitthvað spennandi.“

Inntur eftir því hvort hann fái ekki vel borgað fyrir verkefnið segir Barði það vera langt í frá. „Ekki fyrir svona amerískar indí-myndir. Það er rosalega lítill peningur.“ - fb