Synda yfir Ermar­sundið til að vekja at­hygli á á­hrifum plast­­mengunar á líf­­ríki sjávar

Stefnt er að því að sundhópurinn Marglyttur hefji boðsund sitt yfir Ermarsundið á morgun, þann 10. september ef spár halda og fyrirhuga sundkonurnar að leggja af stað klukkan sex um morguninn að íslenskum tíma. Upprunalega ætlaði hópurinn að leggja af stað í gærnótt en neyddust þær til að fresta boðsundinu vegna veðurs.

Marglytturnar hafa beðið undanfarna daga eftir hagstæðum skilyrðum til að leggjast til sunds en auk veðurs þurfa sjávarföll að vera þeim hagstæð. Um er að ræða 34 km leið á milli borgarinnar Dover í Englandi og höfðans Cap Gris Nez í Frakklandi, og er hún gjarnan kölluð Everest sjósundsfólks. Vegna strauma er vegalengdin sem synt er þó oft helmingi lengri.

„Við Marglytturnar erum meira en til í það að leggjast til sunds við erum búnar að bíða eftir grænu ljósi og nú er það komið. Við byrjum í birtu sem er alveg yndislegt og síðan sjáum við til hvernig straumar og stefnur eru hvort við löndum í Frakklandi í birtu eða myrkri, það skiptir í raun ekki máli þar sem gleðin verður þá við völd að klára þetta langsund,“ segir Sigrún Þ. Geirsdóttir í Marglyttuhópnum og eina íslenska konan sem synt hefur Ermarsundið ein síns liðs.

Fylgjast má með staðsetningu Marglyttanna í rauntíma á kortinu hér fyrir neðan. Reikna má með því að hreyfing fari að sjást á kortinu um klukkan 6:30.

Vilja vekja athygli á plastmengun

Markmiðið með boðsundinu er að vekja athygli á áhrifum plastmengunar á lífríki sjávar en Marglyttur eru að safna áheitum fyrir umhverfisverndarsamtökin Bláa herinn.

„Blái herinn hefur unnið ótrúlegt starf á síðustu 24 árum og við Marglyttur erum stoltar af því að geta stutt þeirra frábæra starf á þennan hátt. Við höfum verið að synda hér daglega og finnum hvað sjórinn er mikið mengaður, enda á lífríkið hér í Ermarsundinu mjög undir högg að sækja,“ sagði Þórey Vilhjálmsdóttir í Marglyttuhópnum.

Marglyttur eru sundkonurnar Sigurlaug María Jónsdóttir, Sigrún Þ. Geirsdóttir (Ermarsundskona), Halldóra Gyða Matthíasdóttir, Birna Bragadóttir, Þórey Vilhjálmsdóttir og Brynhildur Ólafsdóttir, auk skipuleggjendanna Grétu Ingþórsdóttur og Soffíu Sigurgeirsdóttur.  

Hægt að fylgjast með staðsetningu þeirra í rauntíma

Lítill fiskibátur fylgir þeim alla leið. Hópurinn hefur aðstöðu um borð og þar verður einnig eftirlitsmaður sem tryggir að sundið, þ.á.m. skiptingar, fari rétt fram.

Það er margt sem þarf að ganga upp: vindur, straumar, tími flóðs og fjöru og ölduhæð þarf að vera innan vissra marka. „Við erum vongóðar og undirbúum okkur líkt og við séum að fara af stað í nótt,“ sagði Brynhildur Ólafsdóttir í Marglyttuhópnum.

Áætlað er að boðsundið taki 16-18 tíma og mun hver og ein sundkona synda í eina klukkustund í senn í fyrir fram ákveðinni röð og því eru líkur á því að hver Marglytta syndi tvisvar til þrisvar. Fylgjast má með staðsetningu Marglyttanna í rauntíma á kortinu hér fyrir ofan og á þessari slóð á meðan sundinu stendur.

Hvetja landsmenn til að leggja söfnuninni lið

Marglyttur hvetja landsmenn til að styðja við boðsundið yfir Ermarsundið þannig að hægt verði að safna fjárhæð sem getur skipt máli fyrir Bláa herinn. Eimskip er aðalstyrktaraðili Marglytta og með hjálp fyrirtækisins renna öll áheit óskipt til Bláa hersins.

Hægt er að styðja Marglyttur með AUR appinu í síma 7889966 og með því að leggja inn á reikning 0537-14-650972, kt. 250766-5219 (í nafni Grétu Ingþórsdóttur). Allar upplýsingar um boðsundið eru jafnframt á Facebook-síðu Marglytta.