„Ég veit ekkert af hverju borgin klikkaði“

„Ég veit ekkert af hverju borgin klikkaði. Það er nákvæmlega þarna sem við viljum bæta okkur,“ segir Þórdís Lóa Þórhallsdóttir, formaður Borgarráðs um ástæður þess að rekstraraðilar og íbúar á Hverfisgötu fengu aðeins viku fyrirvara vegna framkvæmdanna sem þar hafa staðið yfir í sumar. Þórdís ræddi þessi mál í Bítinu á Bylgjunni í morgun.

Í sumar hafa þó nokkur fyrirtæki á svæðinu hætt starfsemi. Um miðjan júlí lokaði veitingastaðurinn Essensia og í fyrir tveimur dögum var tilkynnt að þrír veitingastaðir að Hverfisgötu 12 hefðu verið lokaðir. Staðirnir voru Dill, Systir og Mikkeller og Friends. Ásmundur Helgason, eigandi kaffistofunnar Gráa kattarins, sem er ofar á Hverfisgötunni, sagði í kvöldfréttum Stöðvar 2 í gær að upplýsingaflæði frá borginni væri ábótavant.

Sjá einnig: „Brandari hve fáir eru í vinnu þarna“

„Viku áður en framkvæmdirnar hófust fengum við að vita af þeim og þá var ég búin að ráða sumarstarfsfólk og gat ekkert bakkað út úr því,“ sagði Ásmundur í kvöldfréttum í gær.

„Þetta verður að gera vel“

Þórdís Lóa segir skilja gagnrýnina sem borgin hefur fengið. „Ég hef sjálf verið að reka veitingastaði þar sem verið er að skera upp götur í marga mánuði og þetta er mjög viðkvæmt. Það eru mjög margar hliðar á þessu máli en ég er alveg sammála þeirri gagnrýni, þetta verður að gera vel. Borgaryfirvöld og sveitarfélög verða að skilja viðkvæmnina sem felst í því að vera með flæði fyrir utan staðinn sem þú rekur og svo allt í einu ekki. Það verður þú bæði að vita með góðum fyrirvara og það verður að vera skemmtilegt og gott aðgengi,“ sagði Þórdís.

Þórdís Lóa vill ekki meina að borgin hafi farið fram úr sér þegar hún veitti leyfi fyrir veitingastaði. „Það verður alltaf einhver þrýstingur þegar ferðaþjónustan springur svona út. Árin 2014-2015 var ekki nægilegt framboð en mikil eftirspurn, síðan taka frumkvöðlar við sér, stækka og opna fleiri staði,“ segir Þórdís. „Það hefur verið gríðarleg breyting á miðbænum á síðasta áratug, það hefur verið fjölgun á veitingastöðum en markaðurinn mun að lokum ná jafnvægi,“ segir Þórdís.

Frestast um nokkra daga eða vikur

Á sama tíma og forseti Borgarráðs, Þórdís Lóa Þórhallsdóttir, var gestur í Bítinu á Bylgjunni sótti borgarstjóri, Dagur B. Eggertsson, Morgunútvarpið á Rás 2 heim. Þar sagði Dagur að framkvæmdir á Hverfisgötu væru eingöngu að frestast um nokkra daga eða vikur. Markmiðið hafi verið að hægt væri að hleypa bílaumferð um Hverfisgötu fyrir Menningarnótt en líklegast verði það ekki fyrr en í september.

„Ég er ekki að gera lítið úr því eða áhrifunum á rekstraraðilana. Auðvitað eigum við að standa okkur vel í að upplýsa og viljum gera það. Það sem mér finnst skipta miklu máli núna er að þær nýju tímasetningar sem hafa verið gefnar út standist,“ segir Dagur sem segir framkvæmdir borgarinnar í sumar gengið mjög vel. Borgin framkvæmi fyrir um tvo milljarða á árinu en það sem kallað verður endurreisn miðborgarinnar hafi tekið í.

Þórdís Lóa, forseti Borgarstjórnar sagði þá að vissulega væri erfitt að sjá góða veitingastaði hverfa á braut úr miðbænum.

„Mér finnst áhugavert að líta til baka til 2014-15 þegar það var mikill þrýstingur þar sem að það vantaði staði, veitingastaði og þjónustu niður í miðbæ. „Þá var gefið í og nú erum við á þeim stað að það eru nokkrir staðir að hætta og aðrir að koma nýir. Það er ótrúlega erfitt að horfa á góða staði. Mér finnst bara erfitt að horfa á Ostabúðina hætta, ég er með söknuð í hjarta,“ sagði forseti Borgarráðs, Þórdís Lóa Þórhallsdóttir í Bítinu á Bylgjunni.