Innlent

Rangur hæðarpunktur tefur á Hverfisgötunni

Garðar Örn Úlfarsson skrifar
Gamlar lagnir og illa kortlagðar valda töfum.
Gamlar lagnir og illa kortlagðar valda töfum. Fréttablaðið/Sigtryggur Ari

Reykjavíkurborg hefur tilkynnt eigendum fyrirtækja við Hverfisgötu um seinkun á framkvæmdum við endurnýjun á Hverfisgötu milli Ingólfsstrætis og Smiðjustígs.

Skýringar sem gefnar hafa verið af hálfu borgarinnar eru meðal annars þær að verktökum gangi almennt illa að manna verk í kring um verslunarmannahelgina og því hafi lítið gerst dagana í kring um þá helgi. Ekki verði unnt að ganga um svæðið á Menningarnótt eins og til stóð og umferð verði ekki hægt að hleypa á í vikunni þar á eftir.

Þá áætla Veitur að vegna rangra hæðarpunkta á frárennslisbrunni við Safnahúsið á Hverfisgötu tefjist verkið um þrjá til fjóra daga.

Hluti af verkinu er að endurnýja lagnir neðanjarðar. Ólöf Snæhólm Baldursdóttir, upplýsingastjóri hjá Veitum, segir að hingað til hafi þurft dælu til að koma skólpi frá Safnahúsinu út í fráveitukerfið í götunni. Við hönnun verksins hafi verið tekið tillit til óskar frá Safnahúsinu um breytingar á fráveitulögninni svo hún yrði sjálfrennandi.

„Í framkvæmdum kemur svo í ljós að hæðarkóði á brunni, sem hönnuður fær í hendur frá Safnahúsi, er rangur og því ekki nægur halli á lögninni til að ná upp sjálfrennsli,“ útskýrir Ólöf. Því þurfi að færa tengingu Safnahússins neðar í götuna til að ná nægum halla á lögnina.

Miklar framkvæmdir hafa staðið yfir við vestari enda Hverfisgötu í sumar. Mynd/Reykjavíkurborg

„Þegar þetta uppgötvast eftir að framkvæmdir hefjast og búið er að tengja lögnina er ljóst að ráðast þarf í breytingar á þessari tengingu og við erum í þeim núna. En áður en við gátum hafist handa við þær þurfti að moka ofan í skurðinn til bráðabirgða til að skapa aðgengi fyrir vinnu við aðra verkþætti; það er lagnir fyrir kalt vatn svo hægt væri að hleypa á þær á réttum tíma,“ útskýrir Ólöf.

Að sögn Ólafar er áætlað að vinna við að færa tenginguna tefji heildarverkið líklegast um þrjá til fjóra daga. „En auðvitað er verið að vinna í öðrum verkþáttum á meðan,“ áréttar hún.

Aðspurð um áætluð verklok segir Ólöf að farið verði yfir þann þátt á verkstöðufundi í dag. Hún bendir á að framkvæmdir í eldri hverfum geti verið erfiðar. Oft sé ekki til nægilega góð og nákvæm gögn um hvað sé undir. Mikið mál geti verið að koma niður lögnum og á sama tíma halda kerfunum gangandi.

„Sem betur fer endast lagnir í jörðu yfirleitt í áratugi og því þarf mjög sjaldan að fara í framkvæmdir eins og þessar sem við erum að vinna með Reykjavíkurborg á þessum hluta Hverfisgötunnar,“ undirstrikar upplýsingafulltrúi Veitna.

Heimir Heimisson, framkvæmdastjóri verktakafyrirtækisins Gleipnis sem vinnur verkið fyrir Veitur og Reykjavíkurborg, vill engum spurningum svara en vísar á verkefnisstjóra hjá borginni. „Það er langbest að hann svari þessu frekar en einhver óbreyttur kálfur,“ segir Heimir. Von er á svörum um málið frá borginni í dag.


Tengdar fréttir

Erfiður vetur sem varð að martröð

Einn eigenda Dill segist nú vera að skoða framhaldið eftir að ákvörðun var tekin um að loka þremur veitingastöðum á Hverfisgötu 12 á einu bretti.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.