Arsenal átti ekki eitt skot að marki City í síðari hálfleik

Þrátt fyrir fínan fyrri hálfleik í dag tapaði Arsenal 3-1 fyrir Englandsmeisturum Manchester City á útivelli í dag.

City komst yfir á fyrstu mínútu leiksins áður en Arsenal jafnaði á elleftu mínútu. Arsenal spilaði vel í fyrri hálfleik en var samt sem áður 2-1 undir í hálfleik eftir tvö mörk frá Sergio Aguero.

Í síðari hálfleik var sótt á eitt mark. Manchester City réð lögum og lofum í leiknum og í síðari hálfleik átti Arsenal ekki eitt skot í átt að marki Manchester City.

Þetta er í fyrsta skiptið í tvö og hálft ár sem Arsenal á ekki skot í átt að marki andstæðinganna heilan hálfleik en það gerðist síðast í maí 2015 er andstæðingurinn var Manchester United.

Arsenal er í sjötta sæti ensku úrvalsdeildarinnar, þremur stigum frá sæti í Meistaradeildinni á næstu leiktíð.

0 - Arsenal failed to attempt a single shot in the second half against Man City; the first time they've failed to have a shot in a half of Premier League football since May 2015 vs Man Utd (first half). Limp. #MCIARSpic.twitter.com/2p6KDxRUJy

— OptaJoe (@OptaJoe) February 3, 2019