PAOK haldið hreinu í sex af síðustu átta leikjum sem Sverrir hefur byrjað

Sverrir Ingi Ingason var á sínum stað í vörn PAOK sem vann 0-3 sigur á Panetolikos í grísku úrvalsdeildinni í kvöld.

PAOK, sem varð grískur meistari á síðasta tímabili, er í 2. sæti deildarinnar með 34 stig, jafn mörg og topplið Olympiacos.

PAOK og Olympiacos eru í sérflokki en tíu stig skilja þau og liðið í 3. sæti, AEK Aþenu, að.

Sverrir Ingi hefur leikið allan tímann í síðustu átta deildarleikjum PAOK.

Liðið hefur unnið sex þeirra, gert tvö jafntefli, aðeins fengið á sig þrjú mörk og haldið sex sinnum hreinu.