Innlent

Tvísýnt um hvort fjölmiðlafrumvarp komist á dagskrá fyrir jól

Elín Margrét Böðvarsdóttir skrifar
Lilja Alfreðsdóttir mennta- og menningarmálaráðherra leggur áherslu á að koma málinu á dagskrá fyrir jólafrí. Það á eftir að koma í ljós hvort það takist.
Lilja Alfreðsdóttir mennta- og menningarmálaráðherra leggur áherslu á að koma málinu á dagskrá fyrir jólafrí. Það á eftir að koma í ljós hvort það takist. visir/vilhelm

Fjölmiðlafrumvarp Lilju Alfreðsdóttur mennta- og menningarmálaráðherra var á dagskrá Alþingis á mánudaginn en var tekið af dagskrá eftir að stjórnarandstaðan greip á það ráð að sniðganga atkvæðagreiðslur til að reyna að hafa áhrif á dagskrá Alþingis þá daga sem eftir eru fram að jólahlé. Þar sem frumvarpið er seint fram komið þarf að samþykkja afbrigði til að taka málið til umfjöllunar.

Ólíkt flestum öðrum málum sem voru á dagskrá á mánudaginn og ekki var hægt að greiða atkvæði um hefur fjölmiðlafrumvarpið ekki komist aftur inn á dagskrá þingsins, hvorki í gær né í dag, en atkvæðagreiðslum var einnig frestað í gær vegna veðurs.

Samkvæmt upplýsingum fréttastofu er það þó stefnan að koma málinu á dagskrá svo það komist til nefndar fyrir jólafrí. En það gæti þó reynst erfitt. Bæði hefur þingflokkur Sjálfstæðisflokksins lýst verulegum efasemdum um frumvarpið og þá þykir einhverjum innan stjórnarandstöðunnar illa farið með tímann að setja málið á dagskrá nú á lokametrunum fyrir jólafrí, þegar ekki ríkir einu sinni samstaða um málið innan stjórnarflokkanna.

Steingrímur J. Sigfússon, forseti Alþingis. Vísir/vilhelm

Steingrímur J. Sigfússon, forseti Alþingis, segir að óskað hafi verið eftir því að málið verði sett á dagskrá áður en þingið fer í jólafrí en samkvæmt starfsáætlun þingsins er ráðgert að síðasti þingfundur fyrir jól verði á föstudaginn. „Í nokkrum tilvikum hafa ráðherrar lagt áherslu á að koma málum til nefndar þó að þau verði ekki afgreidd fyrir áramót einfaldlega af því að það er mikilvægt að vinnan við þau hefjist og fjölmiðlafrumvarpið er eitt af þeim málum,“ segir Steingrímur.

Búið sé að taka frá 400 milljónir króna í fjárlögum næsta árs til að styðja við einkarekna fjölmiðla og æskilegt sé að þingið geti sem fyrst hafist handa við þá vinnu að ákveða útfærsluna á því hvernig þeim fjármunum verður ráðstafað.

„Þannig að það eru alveg efnisleg rök fyrir því að það væri æskilegt að vinnan við það mál geti hafist fyrr en seinna,“ segir Steingrímur. „Það kemur svo bara í ljós, við látum að sjálfsögðu ekki slíkt hafa forgang umfram þau mál sem beinlínis þurfa afgreiðslu fyrir áramót.

Viðræður um þinglok standi yfir

Líkt og áður segir sniðgekk stjórnarandstaðan atkvæðagreiðslur á mánudaginn í þeim tilgangi að reyna að fá einhver af sínum þingmannamálum á dagskrá fyrir jólafrí. Samkvæmt heimildum fréttastofu þykir mörgum innan stjórnarandstöðunnar lítið samráð hafa verið haft við þingflokka stjórnarandstöðunnar um dagskrána. Því kveðst þingforseti ósammála.

„Það voru í gangi og eru í gangi samtöl þar sem þingflokksformenn sitja yfir því og eru þá fyrst og fremst að skoða þá stöðu málanna í nefndum og hvar þau eru á vegi stödd og hvort hægt er að ná utan um afgreiðslur og koma til móts við þessar óskir stjórnarandstöðunnar,“ sagði Steingrímur þegar fréttastofa ræddi við hann í gær. „Það hefur ekkert staðið á vilja til þess að ræða það en það er í sjálfu sér ekki komin niðurstaða í það,“ sagði Steingrímur. Hann kveðst þó nokkuð bjartsýnn á að það takist að halda starfsáætlun og ljúka haustþingi á föstudaginn.

Sjá einnig: Upp úr sauð á Alþingi: Þingmenn sakaðir um ómerkilegheit og skítlega framkomu

„Satt best að segja ættu þessi þinglok að geta orðið auðveld því að við erum mjög vel á vegi stödd með tímanlega afgreiðslu fjárlaga og eiginlega öll fylgifrumvörp fjárlaganna eru núna út rædd og bíða bara atkvæðagreiðslu þannig að það eru þá önnur áramótatengd mál eða mál sem tengjast efndum á svonefndum lífskjarasamningi fyrst og fremst á lista yfir þau mál sem þarf að ljúka fyrir áramót,“ segir Steingrímur.

Ef það gangi ekki eftir séu þó nokkrir dagar í viðbót til jóla sem hægt væri að nýta ef á þurfi að halda. „Við ættum til dæmis laugardaginn upp á að hlaupa ef að á honum þyrfti að halda, nú ef það dugar ekki þá er heil vika eftir fram að helginni fyrir Þorláksmessu.“


Tengdar fréttir

Tekist á um dagskrá þingfunda fyrir jólafrí

Þrjú mál, sem voru á dagskrá þingfundar í dag, voru tekin út af dagskrá fundarins nú undir kvöld eftir að stjórnarandstaðan hafði sniðgengið atkvæðagreiðslur á Alþingi til að reyna að fá forseta Alþingis til að semja við sig um hvaða mál komist á dagskrá þingsins fyrir jólahlé.

Stjórnarandstaðan sniðgengur atkvæðagreiðslur

Stjórnarandstaðan hefur í dag komið í veg fyrir að atkvæðagreiðslur geti farið fram á Alþingi. Samkvæmt heimildum fréttastofu reynir stjórnarandstaðan með þessu að þrýsta á forseta Alþingis og ríkisstjórnarflokkana um að semja við stjórnarandstöðuna um það hvaða mál verða tekin á dagskrá fyrir jólafrí.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.