Anton Sveinn Mckee setti sitt sjötta Íslandsmet á EM í 25 metra laug í Glasgow í dag þegar hann tryggði sér sæti í undanúrslitum í 100 metra bringusundi. Aðeins einn synti hraðar í undanrásunum.

Anton Sveinn kom í mark á 57,21 sekúndum og varð annar í sínum riðli. Hann endaði síðan í öðru sæti í undanrásunum því enginn náði að synda hraðar en hann í lokariðlinum. Undanúrslitin fara fram seinna í dag.

Gamla Íslandsmetið átti Anton sjálfur eða frá því að hann synti á 57,57 sekúndum á HM í Kína árið 2018.

Anton Sveinn hafði sett fimm Íslandsmet í fimm sundum fram að þessu sundi og er því búin að setja met í öllum sex sundum sínum á mótinu.

Hollendingurinn Arno Kamminga náði besta tímanum en hann synti á 56,71 sekúndum og var hálfri sekúndu á undan okkar manni. Þriðji var síðan Hvít-Rússinn Ilya Shymanovich.

Undanúrslitasund Antons fer fram klukkan 17.15 í dag en úrslitasundið er síðan á morgun.