Innlent

Tíðinda­litlir tveir dagar í veðrinu

Sunna Kristín Hilmarsdóttir skrifar
Miðað við spána ætti að viðra ágætlega til útivistar í dag og á morgun.
Miðað við spána ætti að viðra ágætlega til útivistar í dag og á morgun. vísir/vilhelm
Næstu tveir dagar verða tíðindalitlir í veðrinu að því er segir í hugleiðingum veðurfræðings á vef Veðurstofu Íslands.



Í dag er þannig útlit fyrir hæga austlæga átt á landinu. Víðast hvar verður úrkomulaust og nokkuð bjart veður þegar líður á daginn. Þó mun hann aðeins blása með suðurströndinni, kringum tíu metra á sekúndu og á með éljum.



Yfir daginn skríður hitinn yfir frostmarkið með suður- og vesturströndinni, annars er frost á landinu og nær það á sumum stöðum tveggja stafa tölu.



Í nótt var kaldast á Sauðarárkróksflugvelli þar sem það mældist 13 stiga frost.



Á morgun er síðan fremur rólegur vindur í kortunum og suðlægari átt. Líkur á dálitlum éljum á víð og dreif en norðaustan til á landinu verður léttskýjað.



„Af ofansögðu má vera ljóst að næstu tveir dagar eru tíðindalitlir í veðrinu. Það breytist á föstudaginn, þá er útlit fyrir að gangi í hvassa suðaustan- og austanátt sunnan til á landinu. Með fylgir rigning eða slydda á láglendi, en snjókoma til fjalla. Á norðanverðu landinu verður hins vegar þurrt og hægari vindur. Hitatölurnar þokast uppávið með hvassviðrinu,“ segir í  hugleiðingum veðurfræðings.



Veðurhorfur á landinu:



Hæg austlæg átt, úrkomulaust að kalla og birtir allvíða til með deginum. Austan 8-13 m/s og él syðst á landinu.



Suðlæg eða breytileg átt 3-8 á morgun og dálítil él á víð og dreif, en léttskýjað norðaustanlands. Bætir í vind vestast annað kvöld.



Frostlaust að deginum við suður- og vesturströndina, annars frost 0 til 10 stig, kaldast fyrir norðan.



Á fimmtudag:

Suðlæg eða breytileg átt 3-8 m/s og dálítil él á víð og dreif, en léttskýjað norðaustantil á landinu. Frost 0 til 10 stig, kaldast á Norðausturlandi, en frostlaust við suður- og vesturströndina að deginum.



Á föstudag:

Gengur í suðaustan og austan 15-23 á sunnanverðu landinu með rigningu eða slyddu á láglendi. Hiti 1 til 5 stig. Hægari vindur norðantil, þurrt og minnkandi frost.



Á laugardag:

Austan 10-18, hvassast á Suðausturlandi. Rigning eða slydda á láglendi sunnan- og austanlands, en þurrt á Norður- og Vesturlandi. Hiti 0 til 5 stig.



Á sunnudag og mánudag:

Suðaustan- og austanátt og rigning eða slydda með köflum, en þurrt norðanlands. Hiti breytist lítið.

Tengd skjöl




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.