Bíó og sjónvarp

Steindi frumsýnir fyrsta sýnishorn: „Ég varð farþegi í eigin sjónvarpsþætti“

Vésteinn Örn Pétursson skrifar
Steindi tekur alvarlegri nálgun á nýju þættina heldur en fyrri verkefni.
Steindi tekur alvarlegri nálgun á nýju þættina heldur en fyrri verkefni. Stöð 2

Út er komin fyrsta stikla fyrir nýjustu þætti Steinþórs Hróars Steinþórssonar, Steinda Jr. Þættirnir bera heitið Góðir landsmenn og eru öllu alvarlegri en það sem áður hefur sést úr smiðju Steinda. Þættirnir verða frumsýndir á Stöð 2 um miðjan september.

Steindi er hvað þekktastur fyrir grín og glens. Hann gerði garðinn frægan á sínum tíma með tímamótasketsaþáttunum Steindinn okkar. Eins hefur hann verið viðriðinn framleiðslu á þáttum á borð við Steypustöðinni og Draumunum, auk þess sem hann er einn þriggja stjórnenda í útvarpsþættinum FM95BLÖ á FM957.

Þættirnir eru að upplagi viðtals- og heimildaþættir. Fjalla þættirnir um venjulegt fólk á Íslandi, eins og Steindi sagði sjálfur í samtali við Vísi.

„Við tölum við bændur, mjólkurfræðinga, aukaleikara og fleira,“ segir Steindi sem segir það hafa komið sér rækilega á óvart hversu erfitt reyndist að taka venjuleg viðtöl.

Þáttunum er leikstýrt af Gauki Úlfarssyni sem hefur getið sér gott orð í bransanum. Hefur hann meðal annars leikstýrt heimildamyndinni Gnarr, sem fjallar eins og nafnið gefur til kynna um grínistann ástsæla og fyrrverandi borgarstjórann Jón Gnarr.

Þættirnir rúmt ár í vinnslu

Steindi segir þá félaga hafa unnið að þáttunum í rúmlega eitt ár.

Þátturinn tekur ansi óvænta stefnu. Stöð 2

„Upprunalega þá fórum við af stað með sjónvarpsseríu sem átti að vera heimilda- og viðtalsþáttur, en þeir enda á að þróast í allt aðra átt. Ég varð í rauninni farþegi í eigin sjónvarpsþætti,“ segir Steindi.

Hann segist eiga erfitt með að koma efnistökum þáttanna í orð og það sé virkilega erfitt að útskýra hvað þeir ganga út á.

„Þetta er eiginlega bara ferðalag og ég man ekki eftir því að hafa verið svona spenntur fyrir sjónvarpsseríu. Það er mikil vinna á bak við hana og stórt hjarta,“ segir Steinþór.

„Við lofum mjög frumlegri og öðruvísi seríu.“

Sjón er sögu ríkari en stikluna, sem er stórskemmtileg og lofar virkilega góðu, má sjá hér að neðan.

Klippa: Góðir landsmenn - fyrsta sýnishorn
Á Facebook-síðu Stöðvar 2 má síðan finna leik tengdan þættinum þar sem lesendum gefst tækifæri á því að vinna flug til Evrópu og fleira.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.