Innlent

Afar sjaldgæfur gestur á Vatnsnesi

Tryggvi Páll Tryggvason skrifar
Þessi fugl var hinn rólegasti að narta í fræ og biðukollur við Ásbjarnastaði í vikunni.
Þessi fugl var hinn rólegasti að narta í fræ og biðukollur við Ásbjarnastaði í vikunni. Mynd/Einar Ó. Þorsteinsson.

Hinn sjaldgæfi erlendi gestur Víxlnefur sást í grennd við Ásbjarnastaði á Vatnsnesi í Húnaþingi vestra í byrjun vikunnar. Þetta er í fjórða sinn sem fuglategundin sést á Íslandi en fyrir skömmu sáust nokkrir fuglar af þessari tegund við Höfn og í Skaftártungum.

Náttúrufræðingurinn Einar Ó. Þorleifsson hjá Náttúrustofu Norðurlands vestra var kallaður til að greina fuglinn. Í samtali við Vísi segir hann að um karlfugl hafi verið að ræða en þeir eru fagurrauðir með hvítar rákir á dökum væng og minna að sögn Einars dálítið á lítinn páfafauk, líkt og sjá má á meðfylgjandi myndum sem Einar náði af fuglinum.

Víxlnefur er spörfugl af finkuætt og heldur sig helst til í barrskógum í Síberíu og norðurhluta-Ameríku en eiga það til að fara á flakk. Víxlnefur sást fyrst hér á landi í Stöðvarfirði árið 2009 og svo aftur á Suðurnesjum árið 2017. Að sögn Einars komu nokkrir fuglar af tegundinni við á Höfn og í Skaftártungu fyrr í sumar og svo þessi sem lét sjá sig á Vatnsnesi.

„Þetta er auðgreindur fugl og þar var hann bara að bjarga sér á fræjum og biðukollum en þeir geta nú gripið í ýmislegt annað ef þeir komast ekki í köngla, annars lifa þeir á fræjum af greni, lerki og furu og svoleiðis,“ segir Einar sem segir fuglaáhugamenn vera spennta þegar fuglar sem ekki venja komu sína hingað til lands sækja landið heim. 

Væntanlega hingað kominn í leit að fæðu

„Það er mjög spennandi og margir áhugamenn um fugla sem vilja sjá þessa sem að koma og svona. Menn lesa ýmislegt út úr þessu hvort það séu einhverjar breytingar á náttúrunni og lífríkinu en þetta tengist sumpart því sem er að gerast hér,“ segir Einar og vísar þar í aukna ræktun á barrskógum hér á landi.

Fuglinn er litskrúðugur og minnir á páfagauk. Mynd/Einar Ó. Þorleifsson.

Telur hann líklegt að rekja megi komu fuglanna hingað til lands til fæðuskorts í heimkynnum þeirra.

„Ef að það er fæðuskortur fara þeir að leita fyrir sér annars staðar og þá geta þeir jafn vel numið ný lönd,“ segir Einar.

„Maður getur aldrei útilokað að svona fuglar setjist að ef þeir finna réttu skilyrðin, menn eru farnir að rækta svo mikið af barrskógum hér á Íslandi að svona barrskógafuglar geta farið að setjast hérna að,“ segir Einar og bendir á að fugl af svipaðri tegund og Víxlnefur hafi sest hér að.

„Við höfum séð að það hefur sest að hérna annar fugl sem er skildur þessum sem heitir Krossnefur og hann lifir líka á könglum af barrtrjám. Þannig að það er spurning hvað þessi gerir ef þeir eru nógu margir.“

Að sögn Einars er þó miðað við að fuglategund hafi orpið hér á landi í tíu ár í röð til þess að hún geti talist hafa sest hér að, og því væntanlega langt í land að Víxlnefur öðlist þann sess.


Tengdar fréttir

Tónglaðir krossnefir nýbúar á Reykhólum

Allmargir krossnefir hafa gert sig heimakomna í garðinum hjá Tómasi Sigurgeirssyni (Tuma) bónda á Reykhólum og fjölskyldu hans. Þetta eru nýir landnemar í fuglaríki Íslands og hefur varp þeirra verið staðfest á nokkrum stöðum hérlendis á síðustu árum. Krossnefurinn nærist einkum á fræjum grenitrjáa og verpir að vetri til meðan mest framboð er af slíkri fæðu. Svo virðist sem kringum tíu fuglar haldi sig á Reykhólum. Tumi segir að þurft hafi fuglafróðan ferðamann til þess að benda á þessa nýbúa því að heimafólk hafi ekki tekið eftir þeim. Hann kveðst að vísu hafa verið búinn að heyra einhver framandi fuglahljóð en ekki áttað sig á því frekar.

Minna um sjaldgæfa fugla á Vestfjörðum

Óvenju mikið hefur sést til sjaldgæfra erlendra fugla hér við land að undanförnu. Það á þó ekki við Vestfirði en að sögn Böðvar Þórisson, líffræðings hjá Náttúrustofu Vestfjarða eru aðallega tvær ástæður fyrir því að slíkir flækingar eru afar sjaldgæfir í fjórðungnum „Í fyrsta lagi: Þessir flækingar koma með lægðum sem koma nær alltaf upp að landinu á SA og SV landinu. Í öðru lagi: Það eru fáir fuglaskoðarar hér á Vestfjörðum miðað við fyrir sunnan og suðaustanlands, bæði í fjölda og hlutfallslega. Einnig er sérþekking á þessum flækingum mun minni hér t.d. hef ég litla þekkingu á þessum flækingstegundum miðað þá sem eru sunnan lands,“ segir Böðvar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.