Fábregas kitlaði pinnann full hraustlega og má ekki keyra næsta hálfa árið

Cesc Fábregas, leikmaður Monaco, má ekki setjast undir stýri næstu sex mánuðina.

Spánverjinn náðist á 109 kílómetra hraða á klukkustund á götu í London þar sem hámarkshraðinn er 64 kílómetrar á klukkustund 4. desember síðastliðinn.

Fábregas gekkst við hraðakstrinum og baðst afsökunar á honum. Hann fékk 750 punda sekt (tæplega 115.000 íslenskar krónur) og sex refsipunkta. 

Hann var með sex refsipunkta fyrir og var sviptur ökuréttindum í hálft ár.

Fábregas leikur nú með Monaco en þegar hann kitlaði pinnann í London í byrjun desember var hann leikmaður Chelsea.

Fábregas, sem er 32 ára, hefur einnig leikið með Arsenal og Barcelona. Hann varð tvisvar sinnum Evrópumeistari og einu sinni heimsmeistari með spænska landsliðinu.