Bíó og sjónvarp

Hildur slysaðist inn í kvikmyndabransann

Birna Dröfn Jónasdóttir skrifar
Hildur og Máni voru í sinni daglegu gönguferð í blíðunni í Berlín í gær þegar Fréttablaðið náði tali af Hildi.
Hildur og Máni voru í sinni daglegu gönguferð í blíðunni í Berlín í gær þegar Fréttablaðið náði tali af Hildi. Hildur Guðnadóttir

 „Ég var lengst af með kenningu um það að því minna sem ég æfði mig því betri yrði ég, sem var að sjálfsögðu ekki satt,“ segir Hildur Guðnadóttir tónskáld.

„Ég byrjaði fyrst að læra tónlist þegar ég var fjögurra til fimm ára. Flestir í fjölskyldunni minni eru tónlistarfólk svo það var mjög eðlilegt að ég færi að læra tónlist,“ segir Hildur.

„Ég hef alltaf haft mikinn áhuga á sögum. Ég vann mikið í leikhúsi og sæki oft innblástur í sögur þegar ég er að semja tónlist. Svo bara kom í ljós að þetta var form sem hentaði mér, að semja kvikmyndatónlist,“ segir Hildur . Hún er tilnefnd til Emmy-verðlauna fyrir tónlist í þáttunum Chernobyl og varð nýlega meðlimur Óskarsakademíunnar.

Þættirnir fjalla um kjarnorkuslysið sem varð í Úkraínu árið 1986 og byggði Hildur hljóðheim þáttanna eingöngu á hljóðum úr kjarnorkuveri og sinni eigin rödd. Engin hljóðfæri voru notuð í tónlistina.

Hildur heimsótti kjarnorkuver í Litháen í þeim tilgangi að kynnast hljóðinu, lyktinni og upplifuninni af því að vera í slíkum aðstæðum.

„Ég gat tengt við mannlegu hliðina í Chernobyl. Ég skil hvað er að missa ástvini, ég skil hvað er að syrgja og ég skil hvað er að eignast barn og óttast um líf þess. En kjarnorkuhlutinn, það fannst mér bara mjög mikilvægt að fara og upplifa,“ segir hún.

Hildur hefur stimplað sig vel inn í kvikmyndaheiminn en ásamt því að semja tónlistina í Chernobyl vann hún tónlistina í kvikmyndinni Joker, sem kemur út síðar á þessu ári, ásamt fjölda annarra verkefna.

„Ég eiginlega slysaðist bara inn í þetta og eftir því sem að maður vinnur meira innan þessa geira þá kynnist fólk manni betur og það vindur svolítið upp á sig,“ segir Hildur og bætir við að þó að verkefnin sem unnin séu í Hollywood séu stór sé „bransinn“ minni en fólk heldur.

„Það er voða fljótt að kvisast út hver er hvað og hver vill vinna með hverjum og svoleiðis.“

Hildur segir tilnefninguna til Emmy-verðlaunanna hafa komið sér mikið á óvart og að í henni sé mikill heiður fólginn.

„Allt í einu var síminn hjá mér bara rauðglóandi, þá hafði verið birtur listi yfir tilnefningar á netinu og þetta er bara æðislegt,“ segir Hildur.


Tengdar fréttir

Enginn þáttur fengið eins góðar viðtökur

Þættirnir Tsjernóbíl hafa heldur betur slegið í gegn um allan heim að undanförnu en þeir eru byggðir eru á atburðum sem áttu sér stað árið 1986 í Tsjernóbíl í Úkraínu.






Fleiri fréttir

Sjá meira


×