Sjáðu mörkin níu sem Håland skoraði gegn Hondúras

Erling Braut Håland, 18 ára framherji Red Bull Salzburg, skoraði níu mörk þegar Noregur kjöldró Hondúras, 12-0, í C-riðli á heimsmeistaramóti U-20 í Póllandi í gær.

Håland sló þar með met Brasilíumannsins Adaíltons sem skoraði sex mörk í einum og sama leiknum á HM U-20 ára 1997.

Håland skoraði fjögur mörk í fyrri hálfleik og fimm í þeim seinni. Markasúpuna sem Håland bauð upp á má sjá hér fyrir neðan.

Håland er sonur Alf-Inge Håland sem lék með Nottingham Forest, Leeds United og Manchester City á Englandi á sínum tíma.

Sonurinn skoraði tólf mörk fyrir Molde í norsku úrvalsdeildinni á síðasta tímabili. Hann hefur skorað eitt mark í fjórum leikjum fyrir Red Bull Salzburg.

Håland hefur leikið og skorað fyrir öll yngri landslið Noregs og þess verður væntanlega ekki langt að bíða að Lars Lagerbäck velji hann í A-landsliðið.