Þegar Ísraelar veifuðu sjálfir umdeildum fánum á Eurovision-sviðinu
Útspil hinna íslensku Hatara og bandarísku söngkonunnar Madonnu, sem sýndu fána Palestínu í Eurovision-útsendingunni í gærkvöldi í óþökk EBU, hafa vakið mikla athygli – og jafnvel reiði, einkum hjá ísraelskum almenningi og þarlendum yfirvöldum. Sjálfir hafa Ísraelar ekki farið varhluta af slíku en fulltrúar Ísraels í Eurovision árið 2000 reittu sjálfir þarlend yfirvöld til reiði með framgöngu sinni í keppninni það ár.
Sjá einnig: Pólitíkin í Eurovision gömul saga og ný
Hvers kyns pólitísk orðræða og framganga er nú bönnuð í Eurovision, þó að mörkin í þeim efnum séu nokkuð óljós, líkt og liðsmenn Hatara hafa bent á í viðtölum í tengslum við keppnina undanfarna daga og vikur.
Hatari hnykkti á gagnrýni sinni í garð stefnu ísraelskra stjórnvalda með því að sýna palestínska fánann í beinni útsendingu í gærkvöldi. Lokaútspil nokkuð stormasamrar þátttöku sveitarinnar í Eurovision, sem menningarmálaráðherra Ísraels hefur m.a. gagnrýnt í dag.
Árið 2000 sendu Ísraelar hljómsveitina Ping-Pong með lagið Same'ach í Eurovision. Ísraelska ríkissjónvarpið afneitaði atriðinu eftir að sveitin veifaði sýrlenskum fánum og lék sér með gúrkur á afar „djarfan“ máta á einni af lokaæfingum hópsins úti í Stokkhólmi, þar sem keppnin var haldin. Atriðið hafði ekki verið með þessum hætti heima í Ísrael.
Samband Ísraels og Sýrlands var viðkvæmt um aldamótin en árið 2000 gerði ísraelski herinn til að mynda loftárás gegn palestínskum hermönnum í Sýrlandi. Ísraelska ríkissjónvarpið gerði þá einkum athugasemd við notkun sýrlenska þjóðfánans á æfingu hljómsveitarinnar þar sem hana bar upp á þjóðhátíðardegi Ísraels það ár.
Listrænn stjórnandi hljómsveitarinnar sagði í viðtali við breska dagblaðið Guardian að Ping-Pong væru fulltrúar nýs og friðelskandi Ísraelsríkis. Þar kom einnig í ljós að tveir meðlimir sveitarinnar væru blaðamenn, sem störfuðu á ritstjórn dagblaðs sem hefur í gegnum tíðina gagnrýnt ísraelsk stjórnvöld, og einnig að hópurinn hefði skráð sig í keppnina í gríni.
Hér að neðan má sjá flutning Ping-Pong á laginu á Eurovision-sviðinu í Stokkhólmi. Lagið hlaut aðeins 7 stig og lenti í 22. sæti af 24 keppendum. Hér má svo lesa úttekt Vísis á pólitískum atriðum í Eurovision í gegnum tíðina.
Fréttin hefur verið uppfærð.
Tengdar fréttir
Þúsundir krefjast þess að Ísland verði rekið úr Eurovision
Yfir átta þúsund manns hafa skrifað undir undirskriftarsöfnun á vefsíðunni Change.org þar sem þess er krafist að Íslandi verði vikið úr Eurovision eftir að Hatari strengdi á milli sín fána Palestínu í beinni útsendingu á lokakvöldi keppninnar í Tel Aviv í gær.
Eiga Hatarar tveggja tíma yfirheyrslu í vændum?
Dansari í atriði bandarísku söngkonunnar Madonnu á Eurovision í gærkvöldi segist hafa verið stöðvuð á flugvellinum í Tel Aviv og yfirheyrð í næstum tvo klukkutíma áður en hún fékk að yfirgefa landið.
Útvarpsstjóri vissi ekki af áformum Hatara og telur refsingu ólíklega
Magnús Geir Þórðarson vissi ekki af áformum Hatara um að veifa fána Palestínu í beinni útsendingu. Atvikið kom honum þó ekki í opna skjöldu.
Palestínska þjóðin muni aldrei gleyma því sem Hatari gerði fyrir hana
Palestínskur maður, sem búsettur er á Íslandi, segir að Palestínumenn muni aldrei gleyma því sem Hatari gerði fyrir þá með uppátæki sínu í Eurovision í gær. Hann hafi rætt við fjölmarga samlanda sína í dag sem séu fullir þakklæti. Þá segir Palestínu aktívisti að hljómsveitin hafi staðið við orð sín um að nýta dagskrárvaldið til að gagnrýna stefnu Ísraelsríkis. Ísland hafnaði í tíunda sæti í keppninni í gær.
