Xhaka: Vil taka næsta skref

Svissneski miðjumaðurinn Granit Xhaka hefur gefið í skyn að hann sé á förum frá Arsenal.

„Ég er mjög metnaðarfullur og vil taka næsta skref,“ sagði Xhaka í samtali við svissneska fjölmiðla. „Arsenal þarf ekki að vera endastöðin.“

Xhaka, sem er 26 ára, kom til Arsenal frá Borussia Mönchengladbach 2016. Hann framlengdi samning sinn við Arsenal í fyrra.

Aaron Ramsey yfirgefur Arsenal í sumar og liðið má illa við því að missa annan lykilmann á miðjunni.

Arsenal er í 4. sæti ensku úrvalsdeildarinnar og komið í 8-liða úrslit Evrópudeildarinnar.