Menning

Þórdís Helgadóttir valin leikskáld Borgarleikhússins

Kristín Ólafsdóttir skrifar
Brynjólfur Bjarnason, Frú Vigdís Finnbogadóttir, Þórdís Helgadóttir og Kristín Eysteinsdóttir.
Brynjólfur Bjarnason, Frú Vigdís Finnbogadóttir, Þórdís Helgadóttir og Kristín Eysteinsdóttir. Mynd/Borgarleikhúsið

Þórdís Helgadóttir hefur verið valin Leikskáld Borgarleikhússins en Kristín Eysteinsdóttir, leikhússtjóri, tilkynnti um valið á móttöku í Borgarleikhúsinu í dag. Þórdís tekur við af Birni Leó Brynjarssyni en verk hans Magnum Opus verður sýnt í Borgarleikhúsinu á næsta leikári.

Þórdís Helgadóttir er rithöfundur og leikskáld. Hún er menntuð í heimspeki, ritstjórn og ritlist og hlaut Fulbright-styrk til framhaldsnáms í heimspeki við Rutgers-háskóla í New Jersey. Smásagnasafn hennar Keisaramörgæsir kom út 2018 og leikverkið Þensla var sýnt í Borgarleikhúsinu árið 2019 sem hluti af sýningunni Núna! 2019. Með Svikaskáldum hefur Þórdís gefið út ljóðabókina Ég er ekki að rétta upp hönd, og smásögur hennar, ljóð, esseyjur og þýðingar hafa birst víða í tímaritum og bókum. 

Stjórn Leikritunarsjóðs Leikfélags Reykjavíkur stendur fyrir valinu á leikskáldi Borgarleikhússins en í henni sitja Frú Vigdís Finnbogadóttir, Brynjólfur Bjarnason auk Kristínar Eysteinsdóttur, leikhússtjóra. Sjóðurinn var stofnaður árið 2007. 

Fyrri leikskáld hússins eru Tyrfingur Tyrfingsson, Salka Guðmundsdóttir, Auður Jónsdóttir, Jón Gnarr og Kristín Marja Baldursdóttir.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.