Björn Bergmann skoraði í jafntefli gegn botnliðinu

Björn Bergmann Sigurðarson skoraði mark Rostov í jafntefli við Yenisey í rússnesku úrvalsdeildinni.

Björn Bergmann byrjaði leikinn á bekknum fyrir Rostov en hann kom inn á eftir um klukkutíma leik í stöðunni 0-0. Níu mínútum síðar var hann búinn að koma Rostov yfir.

Mark Björns stefndi í að verða sigurmarkið í leiknum þar til á 83. mínútu þegar Babacar Sarr jafnaði leikinn fyrir heimamenn í Yenisey.

Viðar Örn Kjartansson sat allan leikinn á varamannabekknum og Ragnar Sigurðsson var í leikbanni.

Þetta var fyrsti deildarleikur liðanna eftir vetrarfrí. Rostov situr í 7. sæti deildarinnar með 25 stig en Yenisey er á botninum.