Ari Freyr og félagar töpuðu fyrir Anderlecht

Íslenski landsliðsmaðurinn Ari Freyr Skúlason var í byrjunarliði Lokeren þegar liðið fékk Anderlecht í heimsókn í belgísku úrvalsdeildinni í fótbolta í kvöld.

Lokeren er langneðst í deildinni og það blés ekki byrlega fyrir þeim þegar Ivan Santini kom stórveldinu yfir á 16.mínútu. 

Pieter Gerkens tvöfaldaði forystuna eftir rúmlega klukkutíma leik og í kjölfarið var Ara Frey skipt af velli.

Lokeren náði að minnka muninn þar sem Jose Cevallos skoraði á 81.mínútu en nær komust þeir ekki og enn eitt tapið staðreynd hjá Lokeren sem er níu stigum frá öruggu sæti.