Ribéry orðaður við nýliða í ensku úrvalsdeildinni

Þýskir fjölmiðlar hafa orðað Franck Ribéry við Sheffield United, nýliðana í ensku úrvalsdeildinni.

Ribéry hefur leikið sinn síðasta leik fyrir Bayern München en samningur hans við félagið rennur út um næstu mánaðarmót.

Ribéry lék með Bayern í tólf ár og varð níu sinnum þýskur meistari með liðinu og vann Meistaradeild Evrópu með því vorið 2013.

Frakkinn ku vera með tilboð frá félögum í Ástralíu og Katar en Sheffield United ætlar að reyna að klófesta kappann.

Sheffield United endaði í 2. sæti ensku B-deildarinnar á síðasta tímabili og vann sér sæti í úrvalsdeildinni. Liðið lék síðast þar tímabilið 2006-07.