Vardy kominn með 100 mörk fyrir Leicester

Jamie Vardy skoraði sitt 100. mark fyrir Leicester City þegar liðið bar sigurorð af Fulham, 3-1, í ensku úrvalsdeildinni í gær. Þetta var fyrsti sigur Leicester undir stjórn Brendan Rodgers.

Vardy skoraði tvö mörk í leiknum og það fyrra var hans 100. fyrir Leicester. Hann kom til félagsins frá Fleetwood Town 2012.

Vardy hefur alls skorað 101 mark í 262 leikjum fyrir Leicester. Hann er sjöundi markahæsti leikmaður í sögu félagsins.

Gary Lineker er í 6. sæti markalistans með 103 og þess verður væntanlega ekki langt að bíða að Vardy taki fram úr honum.

Arthur Chandler er markahæstur í sögu Leicester en hann skoraði 273 mörk fyrir félagið á árunum 1923-35.