Tvö mörk frá Elínu Mettu í draumabyrjun nýja þjálfarans

Skosku stelpurnar eru á leiðinni á HM í Frakklandi í sumar en þær áttu fá svör á móti þeim íslensku í æfingarleik á La Manga í dag. Þjálfaratíð Jóns Þórs Haukssonar gat því varla byrjað betur.

Íslensku stelpurnar byrjuðu frábærlega í fyrsta leik sínum undir stjórn Jóns Þórs Haukssonar. Íslenska liðið vann 2-1 sigur á Skotlandi í vináttulandsleik á La Manga á Spáni.

Jón Þór Hauksson tók við íslenska liðinu af Frey Alexanderssyni í október síðastliðnum en Freyr hafði verið með kvennalandsliðið frá haustinu 2013.

Aðstæður á La Manga voru frábærar. Sól, 20 stiga hiti og völlurinn flottur. Eftir markalausan fyrri hálfleik þá byrjaði íslenska liðið seinni hálfleikinn mjög vel.

Valskonan Elín Metta Jensen kom íslenska liðinu í 1-0 á 51. mínútu og aðeins þremur mínútum síðar var hún búin að bæta öðru marki sínu við.

Í fyrra markinu átti Hallbera Guðný Gísladóttir sendingu sem Berglind Björg gerði vel með að halda lifandi. Boltinn barst til Öglu Maríu Albertsdóttur sem koma boltanum fyrir markið. Þar var Elín Metta óvölduð við vítapunkt og renndi boltanum í hornið.

Elín Metta bætti svo við öðru marki aðeins þremur mínútum síðar. Berglind Björg fékk góða sendingu upp í hornið, hún átti frábæra sendingu sem Elín Metta kláraði vel.

Skotar náðu að minnka muninn í lokin með frábæru skoti frá Lana Clelland og því náðu stelpurnar ekki að halda markinu hreinu en unnu enga að síður góðan sigur á HM-liði. 50 Íslendingar voru á leiknum á vegum Íslendingafélagsins í Alicante.

Elín Metta Jensen varð þar með tólfta íslenska landsliðskonan sem nær því að skora tíu mörk fyrir íslenska A-landsliðið en Elín Metta var með átta landsliðsmörk fyrir leikinn. Elín Metta hefur nú líka skorað 39 mörk fyrir öll íslensku landsliðin.

Skoska liðið vann sinn riðil í undankeppni HM og verður því með í úrslitakeppni heimsmeistarakeppninnar í Frakklandi næsts sumar. Skotar eru þar í riðli með Englandi, Argentínu og Japan.

Scotland score at the end, but it ends with a 2-1 win for us! #dottir#fyririslandpic.twitter.com/aRTQlIJzfZ

— Knattspyrnusambandið (@footballiceland) January 21, 2019

Ísland - Skotland 2-1 (0-0)

1-0 Elín Metta Jensen (51.)

2-0 Elín Metta Jensen (54.)

2-1 Lana Clelland (90.)

Lið Íslands í leiknum:

Sonný Lára Þráinsdóttir, Breiðabliki

(71., Bryndís Lára Hrafnkelsdóttir, Þór/KA)

-

Ingibjörg Sigurðardóttir, Djurgarden

(87., Elísa Viðarsdóttir, Val)

Glódís Perla Viggósdóttir, Rosengard

Sif Atladóttir, Kristianstad

Hallbera Guðný Gísladóttir, Val

(71., Anna Rakel Pétursdóttir, Þór/KA)

-

Gunnhildur Yrsa Jónsdóttir, Adelaide

(86., Alexandra Jóhannsdóttir, Breiðabliki)

Sara Björk Gunnarsdóttir (fyrirliði), Wolfsburg

-

Fanndís Friðriksdóttir, Adelaide

(59., Selma Sól Magnúsdóttir, Breiðablik)

Elín Metta Jensen, Val

Agla María Albertsdóttir, Breiðabliki

-

Berglind Björg Þorvaldsdóttir, Breiðabliki

(59., Svava Rós Guðmundsdóttir, Roa)