Sigur í átta marka leik hjá Söru Björk og stöllum hennar

Sara Björk Gunnarsdóttir var á sínum stað í byrjunarliði Wolfsburg þegar liðið sótti Frankfurt heim í þýsku Bundesligunni í fótbolta í dag.

Alexandra Popp opnaði markareikninginn strax á 4.mínútu og Caroline Hansen bætti við tveimur mörkum á fyrsta hálftíma leiksins. Útlit fyrir þægilegan stórsigur gestanna.

Heimakonur í Frankfurt voru þó ekki tilbúnar að gefast upp baráttulaust og náðu að minnka muninn í 2-3. Í stað þess að hleypa heimakonum inn í leikinn gáfu Wolfsburg í og skoruðu þrjú mörk á síðasta hálftíma leiksins. Lokatölur því 2-6 fyrir Wolfsburg.

Liðið hefur átta stiga forystu á toppi deildarinnar en Bayern Munchen, sem situr í 2.sætinu, á þó leik til góða.