Íslenski boltinn

Huginn mætti ekki í Fellabæ en stillti upp liði á Seyðisfirði

Tómas Þór Þórðarson skrifar
Leikmenn Hugins bíða á Seyðisfirði en leikurinn er í Fellabæ.
Leikmenn Hugins bíða á Seyðisfirði en leikurinn er í Fellabæ. vísir/aðsend

Áfram heldur sirkusinn í kringum endurtekinn leik Völsungs og Hugins í 2. deild karla í fótbolta sem átti að hefjast í Fellabæ klukkan 16.30. Þar eru Völsungar frá Húsavík mættir, dómarar leiksins en enginn frá Huginn.

Huginn er aftur á móti búið að stilla upp liði á Seyðisfjarðarvelli þar sem að þeir bíða eftir leikmönnum Völsungs til að spila þennan endurtekna leik en á heimasíðu KSÍ stendur að hann eigi að fara fram á Fellavelli.

Sjá einnig: Huginn mætir til leiks: „Það var rætt að setja bumbuboltann í þetta“

Vísir náði tali af Örnu Magnúsdóttur, varaformanni knattspyrnudeildar Hugins, nú rétt í þessu en hún staðfestir að leikmenn Hugins eru klárir í slaginn á sínum heimavelli.

„Huginn er mættur í búning inn á velli. Áfrýjunardómstóll KSÍ úrskurðaði að leikinn skildi endurtaka á Seyðisfjarðarvelli og þar erum við,“ segir Arna.



Sögðu völlinn óleikhæfan

Þetta væri mögulega algjört rothögg á Knattspyrnusamband Íslands því í úrskurðinum stendur vissulega að leikinn á að endurtaka á Seyðisfjarðarvelli.

Birkir Sveinsson, mótastjóri KSÍ, tjáði Vísi aftur á móti nú rétt áðan að Huginn hafði samband við KSÍ í hádeginu og sagði Seyðisfjarðarvöll óleikhæfan. Því færði Knattspyrnusambandið leikinn í Fellabæ.

Aðspurð hvort það orkaði ekki tvímælis að lýsa völlinn óleikhæfan en ætla svo að spila á honum eftir að KSÍ var búið að tilkynna öllum nýjan leikstað vildi Arna engu svara og þakkaði fyrir sig.

Völsungi verður væntanlega dæmdur 3-0 sigur samkvæmt reglugerð KSÍ og þá verða Seyðfirðingar sektaðir um allt að 130.000 krónur. Svo gæti farið að Knattspyrnusambandið rukki Huginn um ferðakostnað Völsungs eða allavega hluta af kostnaðinum eins og lög KSÍ segja til um.

Það virðist allavega ljóst að skrítnasta máli fótboltasumarsins er ekki enn þá lokið.



Hvar endar þetta?

Leikurinn er niðurstaða dóms KSÍ eftir mikið klúður dómara fyrri leiksins sem vísaði leikmanni Völsungs af velli en sá svo að sér þar sem að um rangan dóm var að ræða. Hann setti rauða spjaldið ekki í skýrsluna og uppi varð fótur og fit.

Völsungur og Huginn hafa bæði sent frá sér harðorðar yfirlýsingar í garð KSÍ og Völsungur meðal annars sakað Knattspyrnusambandið um að senda sér hótunarbréf.

Völsungur fór illa að ráði sínu í síðustu umferð og tapaði fyrir Hetti en með sigri í þeim leik og sigri í þessum endurtekna leik í dag hefði liðið farið á toppinn í 2. deildinni fyrir lokaumferðina.

Huginn, aftur á móti, er löngu fallinn og hefur því að engu að keppa í leiknum en formaður knattspyrnudeildar Hugins, Sveinn Ágúst Þórsson, fullyrti við Vísi í morgun að Huginn myndi mæta til leiks og með eins sterkt lið og mögulegt væri.

„Við verðum að hlýða því sem að er dæmt. Við erum lítið félag og getum ekki verið að taka á okkur sektir fyrir einhvern rasshausa hátt,“ sagði Sveinn Ágúst.

Vísir reyndi að ná í Sveinn Ágúst Þórsson, formann knattspyrnudeildar Hugins, um svipað leyti og flauta átti til leiks en hann svaraði ekki símanum.


Tengdar fréttir

Dómstóllinn að skapa slæmt fordæmi

Mikil umræða hefur skapast í knattspyrnuheiminum í kringum leik Hugins og Völsungs sem fram fer í 2. deildinni í knattspyrnu karla á Seyðisfjarðarvelli í dag. Mistök dómarans í leik liðanna um miðjan ágúst urðu til þess að liðin þurfa að mætast aftur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.