Tuchel: Neymar er listamaður sem þarf sérmeðferð

Nýr knattspyrnustjóri Paris Saint-Germain er hrifinn af stórstjörnunni Neymar og segir hann vera listamann sem þurfi að fá sérmeðferð.

Þjóðverjinn Thomas Tuchel tók við PSG fyrr í mánuðinum og hann ræddi við fjölmiðla í dag í fyrsta skipti síðan hann tók við.

„Listamenn eru sérstakir leikmenn og það gefur auga leið að þeir þurfi sérstaka meðferð,“ sagði hinn 44 ára Tuchel.

„Ég hitti hann [Neymar] síðasta sunnudag og við áttum góðan fund. Hann er ótrúlegur leikmaður, einn sá besti í heimi.“

Neymar er dýrasti leikmaður sögunnar eftir 222 milljón evra félagsskipti hans frá Barcelona til PSG síðasta sumar. Hann er sagður óánægður í París og orðrómar eru um að hann sé á leið til Real Madríd.

„Ef við getum fundið leið til þess að byggja liðið upp í kringum hann svo hann geti látið hæfileika sína skína þá erum við með lykilmann til þess að vinna okkar leiki,“ sagði Tuchel.

Brasilíumaðurinn hefur ekki spilað fótbolta síðan í febrúar þegar hann fótbrotnaði. Þrátt fyrir það var hann valinn leikmaður ársins í Frakklandi og var valinn í lokahóp Brasilíu fyrir HM í Rússlandi.