Heiður fyrir CrossFit Reykjavík sem fær þó engar tekjur

Síðasta æfing opna mótsins (The Open) í CrossFit verður tilkynnt hér á Íslandi í lok mars. Viðburðurinn fer fram í húsnæði CrossFit Reykjavík sem mun þó ekki fá neinar beinar tekjur af honum.

„Nei við fáum engar tekjur af miðasölunni. Þetta er alfarið á þeirra vegum og það er bara heiður fyrir okkur að fá að taka á móti þeim,“ segir Hrönn Svansdóttir framkvæmdastjóri CrossFit Reykjavík.

Opna mótið er fyrsti liður af þremur sem þarf að klára til þess að eiga möguleika á að komast á heimsleikana. Það fellst í fimm æfingum sem keppendur þurfa að framkvæma og reyna að ná sem bestum árangri. Mikil leynd hvílir yfir þeim fimm æfingum sem eru hluti af opna mótinu og þess vegna er brugðið á það ráð að tilkynna æfingarnar í beinni útsendingu og fá nokkra þekkta einstaklinga innan þessa heims til þess að framkvæma hana.

Viðburðurinn trekkir að

„Viðburðurinn er haldinn algjörlega af höfuðstöðvum Crossfit og þeir fá húsnæðið hjá okkur. Þeir skipuleggja viðburðinn frá a til ö. Við eigum von á um 40 manns í tengslum við þennan viðburð Mannskapur frá höfuðstöðvum Crossfit setur upp og undirbýr allt fyrir þennan viðburð. Þeir stúka af smá pláss og eru í þrjá daga að setja upp fyrir þetta,″ segir Hrönn.

Hrönn býst einnig við að nokkrir erlendir ferðamenn muni koma til þess að berja íslensku stelpurnar augum.

„Útlendingar hafa haft samband og spurt hvort þeir geti keypt miða og séð keppnina,“ bætir Hrönn við.

„Það náttúrulega kostar að setja þetta allt saman upp en það er á ábyrgð CrossFit og við þurfum að loka hluta af stöðinni til þess að vera með halda þetta. En við erum ekkert að græða á því að halda þetta. Þetta er samt rosa stórt fyrir CrossFit samfélagið á Íslandi,“ segir Annie Mist Þórisdóttir, tvöfaldur heimsmeistari og einn af eigendum CrossFit Reykjavík.

Á þessum viðburði munu íslensku dæturnar Annie Þórisdóttir, Ragnheiður Sara Sigmundsdóttir og Katrín Tanja Davidsdóttir etja kappi. Opna mótið er sérstakt að því leyti að keppendur fá ekki að vita æfinguna nema með mjög litlum fyrirvara og hafa svo fjóra daga til þess að gera sitt besta og senda inn árangur sinn. Annie Mist segir rúmlega 300 Íslendinga skráða til leiks.

„Þetta er fyrsta skrefið til þess að komast áfram en þetta er eina skrefið sem ég fæ að taka með stöðinni minni,“ segir Annie.

Loksins haldið á Íslandi

Þetta er í fyrsta skiptið sem að viðburður tengdur CrossFit verður haldinn á Íslandi.

„Seinustu ár hafa þeir verið að velja ákveðna staði í kringum heiminn til þess að tilkynna þessar æfingar á. Mér fannst kominn tími til að halda eitthvað svona á Íslandi. Við erum nú búin að standa okkur það vel í langan tíma. Það passar líka vel að hafa okkur allar saman, mig, Katrínu Tönju og Ragnheiði Söru þar sem við keppum á móti hvorri annarri. Það er gaman fyrst að við erum allar íslenskar að halda þetta á Íslandi,“ bætir Annie við í lokin.