Carlos sveiflar töfrasprotanum

Þegar Carlos Carvalhal tók við Swansea City 28. desember var útlitið dökkt. Svanirnir voru með 13 stig á botni ensku úrvalsdeildarinnar, fimm stigum frá öruggu sæti. Og fæstir bjuggust við að náungi sem Sheffield Wednesday var nýbúið að reka gæti breytt einhverju þar um.

Núna, 47 dögum síðar, er Swansea með 27 stig í 16. sætinu, stigi frá fallsæti. Staðan er því allt önnur og betri en hún var rétt fyrir áramót.

Carvalhal hefur stýrt Swansea í 11 leikjum. Sex þeirra hafa unnist, fjórir endað með jafntefli og aðeins einn tapast. Markatalan er 20-9. Swansea hefur m.a. unnið Liverpool og Arsenal síðan Carvalhal tók við og aðeins Tottenham og Liverpool hafa náð í fleiri stig í ensku úrvalsdeildinni. Þá er Swansea komið í 16-liða úrslit bikarkeppninnar þar sem liðið mætir fyrrverandi lærisveinum Carvalhals í Wednesday.

Carvalhal hefur náð í alla þessa sigra án þess að gera miklar breytingar á leikmannahópi Swansea. André Ayew og Andy King voru þeir einu sem komu í janúar-glugganum en þeir eiga að fylla skörð Wilfrieds Bony og Leroys Fer sem spila ekki meira með á tímabilinu. Carvalhal hefur einfaldlega unnið vel með liðið sem hann er með í höndunum.

Carlos Carvalhal er 52 ára gamall Portúgali sem hefur farið víða á 20 ára ferli í þjálfun. Hann hefur aðallega starfað í föðurlandinu en einnig stýrt liðum í Grikklandi, Tyrklandi og Englandi og jafnan stoppað stutt við hjá hverju liði. Árangurinn er ekkert stórkostlegur en Carvalhal hefur aðeins unnið einn titil á stjóraferlinum. Hann stýrði Vitória Setúbal til sigurs í portúgölsku deildabikarkeppninni fyrir áratug.

Carvalhal náði hins vegar ágætum árangri með Wednesday og kom liðinu tvisvar í umspil um sæti í ensku úrvalsdeildinni. Og nú er hann búinn að rífa Swansea í gang.

Þetta er reyndar ekki í fyrsta sinn sem stjóri kemur inn á miðju tímabili og snýr gengi Swansea við. Garry Monk, Francesco Guidolin og Paul Clement hafa allir gert það á síðustu árum. Vandamálið hefur verið að fylgja því eftir á tímabili númer tvö. Guidolin og Clement voru báðir reknir á sínu öðru tímabili. Monk náði góðum árangri á öðru tímabilinu en var svo látinn taka pokann sinn á því þriðja.

Það sem Swansea þarf öðru fremur er stöðugleiki. Síðan velska liðið kom upp í ensku úrvalsdeildina 2011 hefur það haft sjö knattspyrnustjóra. Enginn þeirra hefur náð tveimur árum í starfi.

Carvalhal er á réttri leið með Swansea en hans stærsti hausverkur verður að fá liðið til að halda dampi. Það mistókst forverum hans í starfi.