Neymar opnaði markareikninginn strax í fyrsta leik

Brasilíska stórstjarnan Neymar þreytti frumraun sína fyrir PSG í 3-0 sigri á Guingamp í frönsku deildinni í kvöld en hann lagði upp eitt og skoraði annað í leiknum.

Það voru öll augu á Neymar en þetta var fyrsti leikur hans fyrir félagið eftir félagsskipti hans frá Barcelona sem PSG greiddi metfé fyrir.

Parísar-menn voru lengi af stað og var staðan markalaus í hálfleik en gestirnir frá París tóku til sinna ráða í seinni hálfleik.

Jordan Ikoko, varnarmaður Guingamp, lenti í því óláni að skora sjálfsmark á 52. mínútu og tíu mínútum síðar bætti Edinson Cavani við marki eftir frábæra sendingu frá Neymar.

Neymar skoraði svo sjálfur fyrsta mark sitt fyrir félagið á 82. mínútu eftir sendingu frá Cavani en markið var einfalt, lagði boltann í netið af stuttu færi fyrir opnu marki.

Það reyndist síðasta mark leiksins en PSG, Lyon, Monaco, Marseille og St. Etienne eru öll með full hús stiga eftir tvær umferðir.