Vilja frekari skorður við kaupum útlendinga

Átta af hverjum tíu sem afstöðu taka í nýrri könnun Fréttablaðsins eru hlynntir því að settar verði frekari skorður við kaupum útlendinga á jörðum hér á landi. Um 20 prósent telja að það eigi ekki að setja frekari skorður.

Fréttablaðið greindi frá því á mánudag að Kínverjar vildu kaupa Neðri-Dal í Biskupstungum, sem er rétt við Geysissvæðið. Samkvæmt lögum um eignarrétt og afnotarétt fasteigna er íslenskur ríkisborgararéttur eða íslenskt lögheimili skilyrði fyrir því að einstaklingur geti fengið eignarrétt eða afnotarétt yfir fasteignum á Íslandi, þar á meðal veiðirétt, vatnsréttindi eða önnur fasteignaréttindi.

Íbúar á EES-svæðinu hafa sömu réttindi og íslenskir ríkisborgarar. Það hefur hins vegar þótt flækja málið að ráðherra hefur heimild til að víkja frá þessum skilyrðum. Ráðherra getur því veitt íbúum utan EES-svæðisins heimild til að kaupa jarðir á Íslandi.

Lilja Alfreðsdóttir, þingmaður Framsóknarflokksins, telur að undanþágur í lögunum séu of margar og betra væri að Alþingi, en ekki ráðherra, tæki ákvarðanir um undanþágur. „Það getur vel verið að það komi fjárfesting sem sé mjög hagkvæm og sátt yrði um. Þá viljum við ekki loka á hana, en það væri sniðugt að auka valdsvið þingsins í þessu. En númer eitt, tvö og þrjú þá þarf að skýra þetta,“ segir Lilja.

Í reglugerð dómsmálaráðuneytisins segir að aðilar með erlent ríkisfang geti ekki keypt jörð sem er stærri en 25 hektarar. Lilja vill meðal annars fá betur á hreint hvort sú regla sé viðmiðunarregla sem ráðherra geti vikið frá, eða hvort hún er ófrávíkjanleg.

Í febrúar 2013 var mikið rætt um áhuga Kínverjans Huang Nubo á að kaupa Grímsstaði á fjöllum. Í könnun Fréttablaðsins var spurt hvort fólk vildi setja frekari hömlur á rétt útlendinga til að kaupa land á Íslandi. Þá tóku 83 prósent afstöðu til spurningarinnar. Liðlega helmingur, eða 56 prósent, sögðu já en 44 prósent sögðu nei. Andstaðan er því talsvert meiri núna.

Könnun Fréttablaðsins var gerð þannig að hringt var í 1.063 manns í Reykjavík þar til náðist í 791 manns samkvæmt lagskiptu úrtaki þann 28. og 29. ágúst. Svarhlutfallið var 74,4 prósent. Þátttakendur voru valdir með slembiúrtaki úr þjóðskrá. Spurt var: Telur þú að setja ætti frekari skorður við kaupum erlendra aðila á jörðum hér á landi? Alls tóku 82,9 prósent þeirra sem náðist í afstöðu til spurningarinnar.

Fréttin birtist fyrst í Fréttablaðinu.