Segja að Valls muni lýsa yfir stuðningi við Macron

Manuel Valls, fyrrverandi forsætisráðherra Frakklands, mun hvetja stuðningsmenn sína til að kjósa óháða miðjumanninn Emmanuel Macron í frönsku forsetakosningunum í vor.

Frá þessu greinir Le Parisien og vísar í ónafngreinda samstarfsmenn Valls.

Stuðningur við Macron væri mikið áfall fyrir Benoît Hamon, frambjóðenda Sósíalistaflokksins, en Hamon hafði betur gegn Valls þegar flokkurinn og aðrir vinstriflokkar völdu forsetaefni sitt í janúar.

Hvorki kosningalið Valls né Macron hafa tjáð sig um fréttirnar í Le Parisien.

Ónafngreindur samstarfsmaður Valls segir í samtali við Reuters að Valls hafi enn ekki gert upp hug sinn um hvern hann muni styðja.

Fyrri umferð forsetakosninganna fara fram 23. apríl og sú síðari 7. maí.