West Brom og Stoke City skildu jöfn

West Bromwich Albion mættu Stoke City á The Hawthorns,  heimavelli sínum í dag en liðin gerðu 1-1  jafntefli.

Staðan var markalaus í hálfleik og það var ekki fyrr en á 61. mínútu leiksins þegar að Jay Rodriguez kom heimamönnum í West Brom yfir í leiknum með góðum skalla.

Framherjinn stóri og stæðilegi, Peter Crouch, jafnaði svo metin fyrir Stoke á 77. mínútu eftir mikinn misskilning á milli Ahmed Hegazy, varnarmanns West Brom og Ben Foster markvarðar West Brom.

Fleiri mörk voru ekki skoruð og skiptu liðin því með sér einu stigi. West Bromwich Albion situr í fjórða sæti deildarinnar eftir leikinn með sjö stig en Stoke City í því níunda með fjögur en staða þeirra getur breyst eftir hina leiki dagsins.