Hazard hafnaði nýjum samningi frá Chelsea

Eden Hazard hafnaði framlengingu á samningi sínum við Chelsea, en hefur þó ekki fengið neitt tilboð frá Real Madrid.

Þetta hefur Sky Sports eftir föður Belgans, Thierry Hazard.

Orðrómur um að Hazard sé á leið til Spánar- og Evrópumeistaranna hefur verið á kreiki og staðfestir Hazard eldri að sonur hans hafi hafnað framlengingu, sem hefði bundið leikmanninn í London til 2020, vegna möguleikans á skiptum yfir til Spánar.

„Ég get sagt frá því að Eden hafnaði framlengingu á samningi. Þetta var gert svo að hann gæti fylgt eftir áhuga Real, en hann getur vel hugsað sér að spila fyrir félagið.“

„Á þessu augnabliki hefur Real ekki haft samband,“ sagði Thierry Hazard.