Lífið

Skemmtilegast að hjóla fyrir fólkið í Sunnuhlíð

Þórgnýr Einar Albertsson skrifar
Svanur Þorsteinsson með hjólið sitt.
Svanur Þorsteinsson með hjólið sitt. Vísir/anton brink
Við ætlum að halda eitthvað aðeins upp á þetta. Við erum að fara í bústað austur á Apavatni,“ segir Svanur Þorsteinsson hjólreiðagarpur en hann fagnar sjötugsafmæli í dag.



Erla, dóttir Svans, fer fögrum orðum um föður sinn í bréfi sem hún sendi Fréttablaðinu. „Hann er sá þrettándi af sextán systkinum og hörkuduglegur með einsdæmum. Svanur er nefnilega sjálfboðaliði hjá samtökunum Hjólað óháð aldri og fer hjólaferðir með aldraða og alzheimersjúklinga á hjúkrunarheimilinu Sunnuhlíð þrisvar í viku,“ segir í bréfinu.



Svanur segist hafa einkar gaman af hjólaferðunum. „Þetta er með því skemmtilegasta sem ég hef gert,“ segir hann en Svanur hefur hjólað fyrir Sunnuhlíð frá því um miðjan júlí í fyrra fyrir samtökin Hjólað óháð aldri.





Svanur á hjólinu með Ármann Kr. Ólafsson bæjarstjóra í farþegasæti.vísir/svanur
Svanur segir að það vanti sjálfboðaliða til að hjóla fyrir hjúkrunarheimilin. „Það er sérstaklega gott fyrir eldri borgara sem hættir eru að vinna því þetta gengur ekki upp ef maður er í fullu starfi. „Eina hjólið sem hefur verið hjólað svolítið á er Sunnuhlíðarhjólið því ég er að hjóla á því og ég er hættur að vinna.“



„Ég hef hjólað mikið í gegnum tíðina. Landssamtök hjólreiðamanna hittast og fara í hjólreiðaferðir á laugardögum og í einni hjólreiðaferðinni í fyrra þá var farið inn í Hátún þar sem Öryrkjabandalagið er, þar var verið að kynna þessi hjól og ég hreifst af þessu verkefni og fór á námskeið og lærði á þetta,“ segir Svanur en um er að ræða hjól þar sem tveir farþegar geta setið í með hjólarann fyrir aftan sig.



Í bréfi Erlu segir að Svani sé annt um að geta glatt vistmenn með þessum valkosti á útiveru. Hann vilji gera allt sem í valdi sínu stendur til að það sé hægt. „Þar á meðal bauð hann bæjarstjóra Kópavogs í hjólatúr til að sýna honum hvar laga þyrfti gangstéttar og kanta til að hjólið kæmist um Kópavogsdalinn.“



Utan hjólamennskunnar segir Erla að Svanur sé ætíð reiðubúinn að veita hjálparhönd. „Hvort sem um er að ræða flutninga, pallasmíði eða skutlast erindagjörðir fyrir börn sín og er óþreytandi að sækja íþróttaæfingar og keppnisleiki barnabarna sinna átta, hvort sem um ræðir fótbolta, fimleika eða ungbarnaleikfimi.“ 

Tengd skjöl




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.