Nálgunarbann gagnvart móður sem beitti dóttur sína ofbeldi

Hæstiréttur staðfesti í dag úrskurð Héraðsdóms Suðurlands um að kona sem liggur undir sterkum grun um að hafa beitt dóttur sína bæði andlegu og líkamlegu ofbeldi skyldi sæta nálgunarbanni í sex vikur.

Í ákvörðun lögreglustjórans á Suðurlandi frá 2. september kemur fram að stúlkan hafi greint frá alvarlegu og ítrekuðu ofbeldi af hálfu móður sinnar áður en fjölskyldan flutti til Íslands fyrir þremur árum. Dregið hafi úr ofbeldinu eftir að til Íslands kom en það byrjað fljótlega aftur. Um hafi verið að ræða barsmíðar með opnum lófa eða krepptum hnefa og hafi móðir hennar leitast við að höggin lentu í andliti hennar.

Í skýrslutöku hjá lögreglu sagði stúlkan meðal annars að móðir hennar hafi lamið hana í klessu og ekki leyft henni að fara í skóla eftir það til að koma í veg fyrir að marblettir sem hún hafi fengið sæjust og hafi slíkt gerst nokkrum sinnum.

„Ertu heimsk að lemja mig“

Móðir stúlkunnar neitaði alfarið sök um ofbeldi gagnvart henni en viðurkenndi við skýrslutöku að annað slagið, stundum tvisvar í viku eða sjaldnar, rífist þær á háu nótunum..

Tilgreindi stúlkan sambýlismann móður sinnar sem vitni af atvikunum og vinkonu sína í eitt skipti. Þvertók sambýlismaður hennar fyrir að hafa orðið vitni að ofbeldi konunnar í garð dóttur hennar. Vinkona stúlkunnar staðfesti þó frásögn hennar af atviki sem gerðist í herbergi hennar. Kvað hún móður stúlkunnar hafa kallað hana illum nöfnum og gert lítið úr henni. Þá hafi hún heyrt stúlkuna segja við móður sína „Ertu heimsk að lemja mig“. Þegar stúlkan hafi komið út úr herberginu hafi hún verið með greinilegan roða á vinstri helming andlitsins, verið grátandi og skolfið.

Greindi félagsráðgjafa barnaverndar frá ofbeldinu

Í dómnum kemur fram að málefni fjölskyldunnar hafi verið til meðferðar hjá barnaverndaryfirvöldum um tveggja ára skeið og segir í gögnum frá barnavernd að upplýsingar og vísbendingar hafi komið fram um að konan beitti dóttur sína líkamlegu og andlegu ofbeldi. Svo virðist sem málið hafi verið kært til lögreglu í kjölfar þess að stúlkan greindi félagsráðgjafa barnaverndar frá hinu meinta ofbeldi af hálfu móður sinnar.

Með nálgunarbanninu er lagt bann við því að móðir stúlkunnar komi nálægt henni á svæði sem afmarkast af 50 metra radíus. Þá sé henni jafnframt bannað að veita dóttur sinni eftir eftirför, heimsækja, nálgast á almannafæri sem nemur 50 metra radíus frá staðsetningu hennar hverju sinni, eða vera með nokkru öðru móti í beinu sambandi við hana, svo sem með símtölum, tölvupósti eða með öðrum hætti.

Dóm Hæstaréttar má lesa í heild sinni hér.