Sjálfbær þróun og verndun lífríkis verði leiðarljós fiskeldis

Sátt um framtíðaruppbyggingu fiskeldis á Íslandi veltur á að sjálfbær þróun og vernd lífríkis verði höfð að leiðarljósi, samkvæmt skýrslu starfshóps sjávarútvegsráðherra um stefnumótun í fiskeldi sem var kynnt í dag.

Í tilkynningu sjávarútvegs- og landbúnaðarráðuneytisins kemur fram að þetta sé jafnframt kjarninn í samkomulagi Landssambands fiskeldisstöðva, Landssambands veiðifélaga, umhverfis- og auðlindaráðuneytisins og atvinnuvega- og nýsköpunarráðuneytisins.

Starfshópurinn telur mikilvægt að íslensku fiskeldi séu sköpuð bestu möguleg skilyrði til uppbyggingar og verði þannig sterk og öflug atvinnugrein. Með hagfelldum rekstrarskilyrðum megi byggja upp fiskeldi á svæðum sem henta til slíks rekstrar og efla þannig atvinnulíf og byggð í landinu.

Að sama skapi telur starfshópurinn mikilvægt að stuðla að ábyrgu fiskeldi þar sem sjálfbær þróun og vernd lífríkis séu höfð að leiðarljósi. Einungis þannig muni nást sátt um framtíðaruppbyggingu fiskeldis.

Starfshópurinn bendir á að slík sátt helstu hagsmunaaðila sé ekki einungis nauðsynleg fyrir uppbyggingu fiskeldis heldur skapi hún markaðsleg sóknarfæri fyrir íslenskt fiskeldi til framtíðar, þar sem byggt sé á umhverfisvænni ímynd. Því skuli rannsóknir ráða för við uppbyggingu fiskeldis - og í þeim tilfellum þar sem óvissa ríki um áhrif fiskeldis á vistkerfi eða umhverfi verði niðurstöður rannsókna lagðar til grundvallar ákvörðunum stjórnvalda.

Í skýrslunni eru settar fram tillögur sem starfshópurinn telur rétt að komi til framkvæmda og lúta þær að flestum þeim þáttum sem varða uppbyggingu fiskeldis, þar á meðal auðlindagjaldi, áhættumati, erfðablöndun, leyfisveitingum, eftirliti og opinberri birtingu gagna.