Telja ýmsa annmarka vera á akstursbanni og að umferðarþungi muni tvöfaldast

Fetar, félag eigenda torfærubifreiða í atvinnurekstri, segir í tilkynningu að sérútbúnar bifreiðar með færri en níu farþegasæti, á borð við sérútbúna jeppa og lúxusbifreiðar með farþegaflutningaleyfi, falli ekki undir skilgreininguna á hópferðabifreiðum. Gagnrýni þeirra lítur aðallega að því að þeir megi ekki leggja bílum sínum í sérafmörkuð BUS safnstæði þar sem ferðamenn safnast saman og eru sóttir. Stæðin verða á 12 stöðum í miðborginni.

Stjórnarmenn Feta segja jafnframt að skilgreining á leyfi til að nota safnstæði sé óljós og segja það miður að þeim hafi ekki verið boðinn aðkoma að málinu þar sem þeir séu einnig hagsmunaaðilar.

Gagnrýnin kemur í kjölfar akstursbanns í miðbæ Reykjavíkur sem tók gildi 15. Júlí síðastliðinn. Þar er öllum hópferðabílum og sérútbúnum jeppum í atvinnurekstri bannað að keyra í miðbænum. Aðeins þau farartæki sem séu skilgreind sem hópferðabílar megi leggja í safnstæðin. Niðurstaða stýrhóps undir stjórn Hjálmars Sveinssonar, gerði ráð fyrir stækkun á bannsvæði aksturs hópbifreiða til vesturs. Haft var eftir Guðfinnu Jóhönnu Guðmundsdóttur, borgarfulltrúa Framsóknar- og flugvallarvina, í fréttaskýringu Vísis frá lok júní, að þverpólitísk samstaða hafi náðst um málið. 

Aukinn umferðarþungi

Í tilkynningu frá Fetum segir að bannið gæti orðið til þess að aukin umferðarþungi yrði á bannsvæðinu þar sem ferðaskrifstofur og skipuleggjendur munu sækja viðskiptavini sína á svæðið á bifreiðum sem ekki eru undir almennu rekstrarleyfi, til að mynda almennum farþegabifreiðum. Þannig gæti bannið þýtt, að mati þeirra, tvöföldun á fjölda bifreiða í miðbænum og það samræmist varla umhverfissjónarmiðum.

„Bannið mun beina allri umferð hópbifreiða og sérútbúinna jeppa í ferðaþjónustu á fáar tilteknar götur sem í þessu tilfelli eru Hverfisgata, Ægisgata, Ingólfsstræti, Njarðargata, Eiríksgata, Túngata, Lækjargata, Hofsvallagata, Sóleyjargata, Mýrargata, og Vonarstræti. Íbúar við þessa götu eru síður en svo sáttir enda skiljanlegt þar sem öll umferð umræddra bifreiða um miðbæinn safnast á þessar fáu götur sem gerir álagið á þeim margfalt meira en verið hefur og þörf er á,“ segir í tilkynningunni.

Mismuna á milli starfsstétta

Í tilkynningunni segir að verið sé að mismuna á milli starfsstétta þar sem bannið taki ekki til leigubíla, vöruflutningabíla, bílaleigubíla, erlendra hópbifreiða og sérútbúna ferðaþjónustujeppa á erlendum á númerum. Telja þeir að eðlilegra væri að bannið takmarkaðist við ásþunga, fjölda farþega eða stærð bifreiðar.

Jafnframt segja þeir að ekki hafi verið hugsað til þess að ferðaþjónustufyrirtæki sé með aðsetur sitt og bílageymslur í miðbænum. Þá beri einnig að huga til farþeganna sem þurfi að bera farangur langar leiðir. Stjórn Fetar óskar í tilkynningunni eftir afriti af kvörtunum sem borginni hafa borist vegna áreiti af völdum hópbifreiða í miðbænum.



Sagður yfirlýstur andstæðingur

Stjórnarmeðlimir Feta gagnrýna þá einnig Hjálmar Sveinsson, formann stýrihóps um málefnið, og segja hann vera vanhæfan þar sem hann hafi verið yfirlýstur andstæðingur sérútbúinna jeppa og bifreiða í miðbænum almennt.

Vitna þeir í meintar fullyrðingar sem Hjálmar á að hafa látið hafa eftir sér um að sérútbúnir jeppar séu hættulegri en ósérútbúnir jeppar. Vitnað er í að stýrihópurinn um akstursbann í miðbænum hafi virt að vettugi tillögu SAF og íbúasamtaka miðbæjarins og víkkað út bannið að óþörfu.

Ekki náðist í Hjálmar Sveinsson við gerð þessarar fréttar.