Bóndi við Kúludalsá í Hvalfirði hefur höfðað skaðabótamál gegn Norðuráli á Grundartanga vegna tjóns sem hún telur sig hafa orðið fyrir vegna mengunar frá álverinu. Felst tjónið m.a. í dauða hrossa í hennar eigu, sem þurft hefur að fella vegna veikinda sem rakin hafa verið til flúormengunar á svæðinu.
Norðurál gerði kröfu um frávísun málsins og byggði hana á margvíslegum ástæðum. Héraðsdómur Reykjavíkur hefur hins vegar í úrskurði sínum frá því í dag hafnað þeim öllum og mun málið því halda áfram fyrir dómi.
Mengun frá álverinu hefur verið mikið þrætuepli í tæpan áratug. Í niðurstöðum skýrslu sem unnin var fyrir atvinnuvega- og nýsköpunarráðuneytið og var skilað sumarið 2016 komust skýrsluhöfundar, Jakob Kristinsson prófessor og Sigurður Sigurðsson dýralæknir, að þeirri niðurstöðu að líklegt væri að veikindi hrossanna á Kúludalsá mætti rekja til flúormengunar.
Þessari niðurstöðu hefur m.a. verið mótmælt af Matvælastofnun sem telur ekki hægt að útiloka að veikindin megi rekja til offóðrunar og rangrar meðferðar. Nýverið var einnig kynnt til sögunnar rannsókn á krabbameinstíðni á Akranesi og möguleg tenging hennar við mengun frá iðnaðarsvæðinu á Grundartanga þar sem álverið er staðsett.
Bóndi á Kúludalsá hafði betur í fyrstu byltunni við Norðurál í héraðsdómi
Tengdar fréttir
Flúormengun í Hvalfirði: Tók tvö ár að svara erindi
Umhverfisstofnun fékk vitneskju um flúormengun og veikindi hesta Hvalfirði fyrir tveimur árum en er fyrst núna að svara erindi hestaeiganda sem óskuðu eftir formlegri rannsókn á mengun.
Hafnar því að flúrormengun hafi aukist í Hvalfirði
Norðurál, sem rekur álverið á Grundartanga, vísar á bug fullyrðingum oddvita Kjósahrepps um vaxandi flúormengun í Hvalfirði vegna álframleiðslu.
Flúormengun veldur bónda áhyggjum
„Fyrirtækið þarf auðvitað að taka til alvarlegrar skoðunar hvort því takist að takmarka losun flúors,“ segir Sigurður.
Segja veikindi hrossa í Hvalfirði mega rekja til flúormengunar
„Er því tæpast hafið yfir nokkurn vafa að flúormengunin kemur frá álverinu á Grundartanga.“
