Á leiðinni heim til Íslands: Átti að klæða sig úr kjólnum fyrir framan fjögurra ára dóttur sína

Utanríkisráðherra Indlands, Sushma Swaraj, hefur farið fram á það við indverska konsúlinn í Þýskalandi hann skili henni skýrslu um mál Shruthi Basappa. Málið verði skoðað ofan í kjölinn. Shruthi sem er frá Indlandi en hefur búið á Íslandi ásamt manni sínum síðastliðin fimm ár, var skipað að gangast undir líkamsleit á flugvellinum í Frankfurt þann 29. mars.

Shruthi, sem er arkitekt og hefur kennt Íslendingum indverska matargerð, vakti athygli á málinu á Facebook-síðu flugvallarins í Frankfurt þar sem hún velti upp þeirri spurningu hvort það gæti talist hluti af eðlilegri öryggisgæslu að láta farþega fækka fötum og standa í nærfötum einum klæða. Shruthi upplýsir að hún hafi verið á leið í flug frá frá Frankfurt til Berlínar þaðan sem flogið var áfram heim til Íslands.

„Við vorum á heimleið til Íslands frá Indlandi með viðkomu í Frankfurt með fjögurra ára dóttur okkar þegar við vorum beðin um að stíga til hliðar. Um væri að ræða öryggisleit af handahófi án frekari skýringa,“ segir Shruthi.

„Ég var færð í herbergi og beðin um að lyfta kjólnum eða fara úr honum svo það væri hægt að ganga úr skugga um að ég væri ekki að fela neitt undir fötunum. Allt þetta gerðist fyrir framan fjögurra ára dóttur mína,“ segir Shruthi. Hún hafi engar útskýringar fengið á því hvers vegna hún var tekin sérstaklega fyrir. Hún hafi beðið um að hvers lags skönnunarbúnaður yrði notaður frekar en að fækka fötum. Enda væri algjörlega galið að þurfa að fækka fötum án nokkurrar ástæðu og það væri brot á réttindum hennar.

Shruthi segist nýlega hafa gengist undir aðgerð á kvið og því beðið starfsmenn í öryggisgæslu að fara varlega þegar þeir þreifuðu á henni við líkamsleitina. Þeirri beiðni hafi ekki verið tekið fagnandi og starfsmaður í öryggisgæslunni endurtekið öskrað á hana. Yfirmaður starfsmannsins hafi verið sama sinnis, Shruthi ætti að fækka fötum.

„Af hverju eru farþegar beðnir um að fækka fötum? Mér finnst glatað að þurfa að spila út kynþáttaspilinu (e. the race card) en ég var eini farþeginn sem var tekinn afsíðis og eftir að starfsmenn urðu þess varir að ég horfði endurtekið í áttina til eiginmanns míns skiptu þeir skyndilega um skoðun og létu nægja að þreifa á mér við leitina.

Málið hefur vakið mikla athygli í Indlandi þar sem utanríkisráðherrann, Sushma Swaraj, krefst svara frá konsúlnum í Þýskalandi. Nýtti hún Twitter til að setja pressu á flugvöllinn í Frankfurt vegna þessa.

Raveesh - Plz send me a report on this. @CGIFrankfurt https://t.co/Aa2iljmsIG

— Sushma Swaraj (@SushmaSwaraj) April 1, 2017

„Ég er alltaf „hin útvalda“ í öryggisleitum af handahófi,“ sagði Shruthi á Facebook-síðu sinni. „Auðvitað er það bara tilviljun. Auðvitað tengist það því ekkert að ég sé brún. En þetta gerist í hvert einasta skipti. Hvert. Einasta. Skipti.“

Shruthi tók þátt í vel heppnuðu markaðsátaki fyrir jólin 2015 þar sem fólk af erlendu bergi brotið deildi reynslu sinni af verunni á Íslandi.

Málið hefur vakið töluverða athygli í Indlandi og er fjallað um það í fjölmörgum indverskum miðlum. 

Einar Hlér Einarsson, eiginmaður Shruthi, sagði í samtali við Vísi að þau myndu ekki tjá sig frekar um málið.