Þrettán látnir eftir að bílsprengja sprakk í Mogadishu

Að minnsta kosti þrettán eru látnir eftir að bílsprengja sprakk í sómölsku höfuðborginni Mogadishu í morgun. Sprengingin varð fyrir utan hótel sem stendur við fjölfarna götu.

„Við höfum flutt þrettán látna á brott og fjórtán særða til viðbótar. Mögulegt er að tala látinna komi til með að hækka enn frekar,“ segir Abdikadir Abdirahman, talsmaður heilbrigðisyfirvalda.

Lögregla í borginni greindi fyrst frá því að tveir hafi látist í árásinni og tveir særst.

Nokkrum tímum fyrir árásina kom til átaka milli lögreglu og manns á sendiferðabíl sem neitaði að stöðva bíl sinn við vegartálma. Skaut lögregla þá að bílnum með þeim afleiðingum að bíllinn sprakk. Ökumaður sendiferðabílsins fórst og tveir til viðbótar særðust.