Skotárás í skóla í franska bænum Grasse

Þrír særðust í skotárás í skóla í franska bænum Grasse í suðausturhluta Frakklands um hádegi.

BFMTV greinir frá því að maður vopnaður nokkrum skotvopnum hafi ruðst inn í Tocqueville-skólann , skotið að skólastjóranum og sært tvo til viðbótar. Að sögn Le Figaro er enginn í lífshættu.

AFP segir frá því að einn hafi verið handtekinn og er mögulegt að annar árásarmaður hafi lagst á flótta. Hans er leitað. Nice Matin hefur eftir heimildarmönnum sínum að tveir nemendur við skólann hafi skotið að fólkinu. Hinn handtekni er sautján ára gamall.

Í frétt Sky kemur fram að talið er að árásarmennirnir hafi ætlað sér að skjóta samnemenda og að skólastjórinn hafi særst þegar hann reyndi að skerast í leikinn. Aðrir fjölmiðlar segja að skólastjórinn hafi verið skotmarkið.

Hinn handtekni á að hafa verið vopnaður riffli, tveimur skammbyssum og tveimur handsprengjum.

Frönsk yfirvöld sendi út viðvörun um árás í smáforriti sínu. Búið er að auka öryggisgæslu í öðrum skólum í Grasse og er fólk hvatt til að halda sig innandyra.

Talsmaður lögreglu segir enn of snemmt að segja til um hvort um hryðjuverkaárás hafi verið að ræða.

Grasse er bær rétt norður af Cannes á Miðjarðarhafsströnd Frakklands.