Þungavigtarleiðtogar ESB-ríkja funda í Versölum

Leiðtogar stærstu aðildarríkja Evrópusambandsins koma saman til fundar í Versölum í Frakklandi í dag til að ræða framtíð sambandsins í skugga aukins popúlisma í álfunni og væntanlegrar útgöngu Bretlands úr ESB.

Á gestalistanum eru Angela Merkel Þýskalandskanslari, François Hollande Frakklandsforseti, Mariano Rajoy, forsætisráðherra Spánar, og Paolo Gentiloni, forsætisráðherra Ítalíu.

Leiðtogarnir munu á fundinum búa sig undir það sem framundan er, en stærri leiðtogafundur verður haldinn í Róm þann 25. mars þar sem þess verður minnst að sextíu ár eru liðin frá því að Rómarsáttmálinn var undirritaður sem leiddi til sköpunar hins sameiginlega markaðar.

Kosningar fara fram víða í álfunni á árinu en um miðjan mánuðinn munu Hollendingar kjósa sér nýtt þing, Frakkar kjósa sér nýjan forseta í vor og í haust ganga Þjóðverjar til þingkosninga.