Aldrei fleiri skemmtiferðaskip

Met verður slegið í komum skemmtiferðaskipa til Íslands á árinu en alls hefur verið bókað bryggjupláss fyrir 71 skemmtiferðaskip í Reykjavík í 134 heimsóknum. Með þeim verða rúmlega 128 þúsund farþegar og um 56 þúsund áhafnarmeðlimir. Á síðasta ári komu 58 skemmtiferðskip til hafnar í Reykjavík í 112 heimsóknum. Farþegarnir voru rúmlega 109 þúsund og höfðu þá aldrei verið fleiri á einu ári.

Björn Einarsson er framkvæmdastjóri TVG-Zimsen en fyrirtækið, ásamt dótturfyrirtækinu Gáru, sér um að þjónusta langflest skemmtiferðaskip sem hingað koma. Hann segir að fjölgunin hafi verið stigvaxandi ár frá ári undanfarið og þessi þróun haldi áfram.

„Útlit er fyrir enn meiri fjölgun á árinu 2018 og erlendar skipaútgerðir eru þegar byrjaðar að panta bryggjupláss á næsta ári. Það er mjög mikill áhugi á Íslandi hjá skipaútgerðum um allan heim og hann er sífellt að aukast. Ísland og norðurslóðir hafa mikið aðdráttarafl og það er mikilvægt að nýta það vel og með faglegum hætti,“ segir Björn og bætir við að þetta séu ekki aðeins risastór skemmtiferðaskip.

„Við sjáum fjölbreyttari flóru skipa sem koma hingað eins og snekkjur og minni lúxusskip auk rannsóknarskipa. Þetta er búið að vera mjög viðburðaríkt ár og meira en nóg að gera hjá Gáru og TVG-Zimsen að þjónusta öll þessi skip. Þetta er mjög spennandi þróun og það er okkar mat og sýn að það séu mikil tækifæri hvað þetta varðar,“ segir hann.

Björn segir að skemmtiferðaskipin sem koma hingað til lands séu ekki einungis að sækja höfuðborgina heim heldur sigli mörg þeirra meðfram landinu og hafi viðkomu á fleiri stöðum. „Þetta er að sjálfsögðu mjög jákvætt fyrir mörg byggðarlög á landsbyggðinni enda eru litlar hafnir að koma sífellt meira inn í þessar siglingar. Þetta hefur í för með að minni byggðarlög fá fleiri ferðamenn í heimsókn en ella sem skilar sér í aukinni verslun og þjónustu fyrir mörg þeirra og hefur því jákvæð efnahagsleg áhrif á byggðarlögin," segir hann.

Fréttin birtist fyrst í Fréttablaðinu