Nítján látnir eftir eldsvoða á vistheimili barna

Að minnsta kosti nítján eru látnir og á þriðja tug slasaðir eftir eldsvoða á vistheimili barna og unglinga skammt frá höfuðborg Gvatemala í morgun. Ekki hefur verið greint frá hversu mörg börn eru á meðal hinna látnu.

Upptök eldsins eru enn sem komið er ókunn, en síðastliðinn þriðjudag brutust út óeirðir á vistheimilinu og allt að sextíu börn struku. Sum þeirra hafa lagt fram ásakanir um illa meðferð og kynferðislega misnotkun af hálfu starfsfólksins.

Þá kemur fram á vef breska ríkisútvarpsins að vistheimilið rúmi 400 ungmenni, en að mun fleiri hafi verið vistaðir á heimilinu.