Úlfur Úlfur með óvænt útspil: Þrjú myndbönd gefin út á sama deginum og plata á leiðinni

Rappsveitin Úlfur Úlfur gaf í dag út þrjú tónlistarmyndbönd í einu og opnaði sveitin einnig glænýja vefsíðu.

Þeir Arnar Freyr Frostason og Helgi Sæmundur Guðmundsson mynda rappteymið saman en sveitin er ein sú vinsælasta á Íslandi.

Þeir greina frá því á Twitter að ný plata komi út á föstudaginn og ber hún nafnið Hefnið okkar.

Myndböndin sem komu út í dag eru við lögin Geimvera, Mávur og Bróðir en þau má sjá hér að neðan. Það er líklega algjört einsdæmi í íslenskri tónlistarsögu að hljómsveit gefi út þrjú myndbönd á einum og sama deginum.