Gylfi keppir við Emre Can um besta markið en þið getið hjálpað honum að vinna

Gylfi Þór Sigurðsson skoraði frábært mark fyrir Swansea City á móti Manchester United á Old Trafford um helgina og markið hans kemur að sjálfsögðu til greina sem eitt af flottustu mörkum vikunnar hjá Sky Sports.

Gylfi fær reyndar mikla samkeppni ekki síst frá Liverpool-manninum Emre Can sem skoraði með hjólhestaspyrnu á móti Watford í gærkvöldi. Þá skoraði Spánverjinn Pedro einnig flott mark fyrir Chelsea á móti Everton á Goodison Park.

Aðrir sem gera tilkall í það að eiga flottasta mark vikunnar hjá Sky Sports eru þeir Alvaro Negredo fyrir Middlesbrough á móti Manchester City, Jamie Vardy fyrir Leicester á móti West Bromwich og Willian fyrir Chelsea á móti Everton.

Gylfi var ekki búinn að skora síðan í febrúar eða í tíu leikjum í röð og það var því frábært fyrir hann að sjá boltann í markinu. Markið tryggði Swansea City einnig dýrmætt stig í fallbaráttunni.

Sky Sports biður að venju lesendur síðunnar til að velja besta mark umferðarinnar og það er hægt að kjósa mark Gylfa með því að smella hér.