98 tonn af eiturlyfjum urðu eldi að bráð

Yfirvöld í Kabúl lögðu í gær eld að 98 tonnum af vímuefnum. Í hrúgunni mátti meðal annars finna morfín, ópíum, heróín, hass og ólöglega áfenga drykki. Hald hafði verið lagt á efnin í aðgerðum þarlendra lögreglumanna á síðustu mánuðum.

Slíkar vímuefnabrennur eru árlegur viðburður í landinu þótt bálkösturinn fari stækkandi ár frá ári. Óvíst er hvort það má rekja til aukinna afkasta í framleiðslu, röggsemi laganna varða eða löngunar stjórnvalda til að hafa brennuna sem stærsta.

Afganistan er þekkt ópíumræktarland en efnið er afar ódýrt í landinu. Ef við miðum við ópíumverð þar í landi, og gefum okkur að eldsmaturinn hafi eingöngu verið ópíum, var þarna kveikt í rúmum milljarði íslenskra króna. Sé hins vegar miðað við verð á gramminu í Þýskalandi er upphæðin sex hundruð sinnum hærri.

Fréttin birtist fyrst í Fréttablaðinu.